20.11.2024 | 15:32
Վեդիի Նոր Կյանք բնակավայրում տեղադրվել է լուսանկարահանող սարք
Անգամ պատերազմում նման բան չէինք տեսել. ինչ են պատմում ՈՄԱ-ի կամավորները «Սուրմալու»-ի դեպքից. ՏԵՍԱՆՅՈՒԹ
Հասարակություն
22.08.2022 | 20:46
Թովմաս Ծատուրյանը որպես կամավոր մասնակցել է 44-օրյա պատերազմին։ «Սուրմալու» առևտրի կենտրոնում պայթյունից հետո էլ ՈՄԱ-ից կամավորական ընկերների հետ օգնել է փրկարարներին։ Ասում է՝ այն, ինչ տեսել է այստեղ, մարտի դաշտում տեսածի ու զգացածի հետ համեմատել չի կարող: ՈՄԱ ռազմահայրենասիրական հասարակական կազմակերպության մեկ այլ անդամ Արմեն Ալոյանն էլ ասում է՝ «Սուրմալու»-ի պայթյունն իր հետևանքներով իսկապես աննախադեպ է։ Բարդ էր՝ խոստովանում է Արմենը․ փլատակներում մնացած քաղաքացիներին փորձել են դուրս բերել, բայց առաջին օրը չի հաջողվել։ Պարզապես անհնար էր՝ հավելում է Թովմասը։
«Առաջին օրը քաոսային իրավիճակ էր, պետք էր հասկանալ հավանական տարածքները, որտեղ մարդիկ կլինեին, որ այդ հատվածներից սկսենք փնտրել»,- ասում է Թովմասը։
Պնդում է՝ իրականությանը չեն համապատասխանում խոսակցությունները, թե պայթյունի առաջին օրը տարածքում տեխնիկա չի աշխատել։ Արմենն էլ է վստահեցնում՝ տեխնիկա աշխատել է այն պահից, երբ հնարավոր է եղել․ «Եղել են վնասված մեքենաներ, խանութի ապրանքները դուրսը լցրած էին․ պիտի մաքրեին, որ տեխնիկան կարողանար աշխատել»։
«Սուրմալու»-ի պայթյունի հետևանքով զոհվել է 16 մարդ, այդ թվում՝ հղի կին ու հնգամյա երեխա։ Փրկարարները նրանց մարմինները հայտնաբերել են օգոստոսի 15-ի գիշերը։ Արդյո՞ք հնարավոր էր փրկել նրանց, եթե նույն օրը հայտնաբերեին։
«Քանի որ իրենք եղել են նկուղային հարկում, ըստ իմ վերլուծության, այնտեղից ողջ հանել հնարավոր չէր․ տվյալ ժամանակահատվածում ջերմաստիճանը եղել է 82 աստիճան»,- պատմում է Թովմասը։
Պայթյունի հետևանքով անհետ կորած համարվող 1 քաղաքացի կա՝ 55-ամյա Վանիկ Խաչիկի Ամիրխանյանը, 16 հայտնաբերված մարմինները նույնականացվել են։ Ըստ ԱԻՆ-ի՝ անհետ կորած համարվող քաղաքացին եղել է հզոր պայթյունի էպիկենտրոնում։ ՈՄԱ-ի անդամները դեպքի վայրից միայն մարմիններ են գտել։ Փորել են հիմնականում ձեռքով՝ ենթադրյալ տուժածներին չվնասելու համար։ Նույն նկուղում 5 քաղաքացու մարմին են գտել։
Առանց ձեռնոցի աշխատելն անհնար էր, ասում է Թովմասը՝ հավելելով, որ նույնիսկ պայթյունից 2 օր անց քարերը տաք էին։ Եղել են նաև կամավորներ, որոնք իրենց կամքից անկախ՝ խոչընդոտել են որոնողափրկարարական աշխատանքների իրականացմանը։
«Սուրմալու» առևտրի կենտրոնում պայթյունը, ըստ պաշտոնական վարկածի, արձանագրվել է հրավառության նյութերի համար նախատեսված պահեստում։ Քննություն է իրականացնում Քրեական օրենսգրքի երկու՝ հրդեհային անվտանգության և դյուրավառ կամ այրիչ նյութերի պահպանման կանոնները կամ պահանջները խախտելու հոդվածներով։ Ըստ ՔԿ մամուլի խոսնակ Վարդան Թադևոսյանի՝ հարցաքննվել է 9 տասնյակից ավելի քաղաքացի, այդ թվում՝ ՔՏՀԱ տեսչական մարմնի աշխատակիցները։ Այս պահին կասկածյալներ ու մեղադրյալներ չկան։ Նախաքնություննը շարունակվում է։
Մանրամասները՝ տեսանյութում։
Արփի Հակոբյան
