20.11.2024 | 16:30
Հայտնաբերվել են ալկոհոլային խմիչքի ընդհատակյա արտադրամասեր
Փրկարար շունը քաղաքացիների հետքեր է գտել. անհետ կորած համարվող քաղաքացուն դեռ փնտրում են․ ՏԵՍԱՆՅՈւԹ
Հասարակություն
19.08.2022 | 21:02
Փրկարար շուն Ջեքն արդեն 6 օր է՝ մասնակցում է «Սուրմալու» առևտրի կենտրոնի տարածքում իրականացվող որոնողա-փրկարակական աշխատանքներին։ Ջեքը գտել է զոհված քաղաքացիների հետքերը, որից հետո փրկարարներն այդ հատվածներում են որոնում իրականացրել։
33-ամյա Ջեյն Ղազարյանը կինոլոգ է արդեն 10 տարի, «Սուրմալու»-ի տարածքում պայթյունից անմիջապես հետո ջոկատը եղել է դեպքի վայրում, աշխատել են գիշեր ու ցերեկ, բայց բավական բարդ էր՝ խոստովանում է Ջեյնը։
«Ծխատար, առաջնային գոտի է, և շան համար ինքնին բարդություն է, որովհետև չի կարողանում կողմնորոշվել՝ հոտը ո՞ր կողմում է»,- ասում է հետախույզ-կինոլոգը։
Որոնողա-փրկարարական աշխատանքները վերսկսվել են առավոտից, եռահարկ, մասնակի փլուզված շենքից երկաթբետոնե կոնստրուկցիաներն են հեռացվում, որ փրկարարներն ու կինոլոգները ներս մտնեն։
«Սուրմալու»-ում տեղի ունեցած պայթյունի հետևանքով անհետ կորած համարվող 2 քաղաքացի կա, 16 հայտնաբերված մարմիններից մեկը նույնականացնել դեռ չի հաջողվել․ նմուշառում վերցրել են, պատասխանները հայտնի կլինեն մի քանի օրից․ հավանաբար, հենց նա է անհետ կորած համարվողներից մեկը։ ԱԻՆ փրկարարները հիմա մեկ անհետ կորածի են փնտրում․ քաղաքացին, որ «Սուրմալու»-ի աշխատակից էր, եղել է հզոր պայթյունի էպիկենտրոնում, իսկ պայթյունից հետո բարձր ջերմաստիճանով հրդեհ է բռնկվել՝ ասում է ԱԻՆ ՓԾ տնօրեն Արմեն Գասպարյանը։
«Շատ բարդ է լինելու անհետ կորած քաղաքացու մարմինը հայտնաբերելը»,- ընդգծում է Գասպարյանը։
Փրկարարները չափազաց զգույշ են աշխատում․ վթարային եռահարկ շենքն ամեն վայրկյան կարող է փլվել։
«Հնարավոր է՝ չգտնենք անհետ կորած համարվող քաղաքացուն»,- նշում է Ջեյնը։
Բայց կինոլոգներն ու փրկարարները ջանք չեն խնայում նրան գտնելու համար․ գոնե մասունքները գտնենք՝ ասում է հետախույզ-կինոլոգը։
«Սուրմալու» առևտրի կենտրոնում հրդեհաշիջման և որոնողա-փրկարարական աշխատանքներին հերթափոխերով մասնակցել են ՓԾ տարածքային և կառուցվածքային ստորաբաժանումներից 1111 փրկարարական ծառայող։ Փրկարարները փլատակներից դուրս են բերել 10 տուժածի։ «Սուրմալու»-ում որոնողա-փրկարարական աշխատանքները կդադարեցվեն միայն այն դեպքում, երբ գտնեն անհետ կորած քաղաքացուն, որից հետո էլ կսկսեն շենքն ապամոնտաժելու աշխատանքները։
Մանրամասները՝ տեսանյութում։
Արփի Հակոբյան
