«Արտահերթ ընտրություններում մենք կապահովենք ՀՀԿ-ի յուրաքանչյուր քվեն»․ «Ելք» անդամ. ՏԵՍԱՆՅՈՒԹ

Հնարավոր արտահերթ ընտրություններում Նապոլեոն Ազիզյանը կանխատեսում է «Ծառուկյան» դաշինքի հաղթանակը։ «Էսօր հարցումներ են անում, գրում են՝ Նիկոլ Փաշինյան 75 տոկոս, «Ծառուկյան» դաշինք՝ 5 տոկոս։ Դրանք ստից թվեր են, հետո կգա, կերևա»,- համոզված է ծառուկյանական պատգամավորը։

Նապոլեոն Ազիզյանը չի վախենում Հանրապետականներից։ Նրանք չեն կարող վերադառնալ իշխանության։ «Էսօր ընենց իրավիճակ ա, որ էդ նույն  ժողովուրդը ոտքի դուրս կգա և կառավարության ծրագիրը կընդունեն։ Դրա համար նման քայլի չեն գնա Հանրապետականները»,- պնդում է Ազիզյանը։

Պատգամավորը չի ափսոսում, որ Հանրապետականը դարձել է ընդդիմադիր՝ «թող մի քիչ էլ ընդդիմադիր լինեն»։ Միաժամանակ ուրախ է, որ հանրապետականները չեն կարող փախչել կուսակցությունից և տեղավորվել իշխանական այս կամ այն կուսակցության մեջ։ «Մարդը փախնում ա, եթե տեղ ունի ավելի հարմար պատսպարվելու, այսինքն, ո՞նց եք մտածում, որ Նիկոլ Փաշինյանն ասի՝ եկեք մտեք իմ կուսակցությու՞ն»,- ասում է պարոն Ազիզյանը։

Վերջապես ընդդիմադիր դարձած Խոսրով Հարությունյանը արտահերթ ընտրությունների անհրաժեշտություն չի տեսնում, թեպետ դրա բոլոր նշանները կան։ «Երբ իրական ուժերի հարաբերակցությունը էապես տարբերվում է այն հարաբերակցությունից, որ կա խորհրդարանում։ Այսօր մենք այդ իրավիճակն ունենք»,-նշում է ՀՀԿ խմբակցության անդամը։

Սակայն նա ընտրություններ չանցկացնելու իր բացատրությունն ունի՝ առաջիկայում այնպես չէ, որ իշխանության եկած ընդդիմադիր ուժը կունենա նույն հեղինակությունը, որ ունի հիմա։ «Որոշ ժամանակ անց, երբ կրքերը կհանդարտվեն, երբ իրական ուժերի հարաբերակցությունը կձևավորվի, ազդեցություն, հանրային աջակցություն, այդ ժամանակ հնարավոր կլինի ռեալ խոսել ընտրությունների մասին հերթական կամ արտահերթ»,- ենթադրում է Խոսրով Հարությունյանը։

«Ելք» դաշինքի ցուցակով պատգամավոր լինելու առաջին օրերն ապրող Ալեն Սիմոնյանը շտապում է, որ այդ ընտրությունները լինեն հնարավորինս շուտ։ «Եթե հնարավոր լիներ, ենթադրենք, այս կիրակի նշանակել, մենք ընտրությունները կաշխատեինք այս կիրակի կազմակերպել»,- ասում է Ալեն Սիմոնյանը։

Իշխանությունն, ըստ պարոն Սիմոնյանի, արդեն սկսել է միջոցներ ձեռք առնել, որ ընտրությունները տեղի ունենան։ Պատգամավորը ենթադրում է, որ դրանք, այնուամենայնիվ, տեղի կունենան այս տարվա աշնան և ձմեռվա արանքում և լինեն առավելագույնս լեգիտիմ անկախ արդյունքներից։

«Եվ, այո, դրա համար, այդ ամենը նախապատրաստելու համար ժամանակ է պետք։ Մենք ստանձնել ենք պարտավորություն, որ դրանք արագ պետք է տեղի ունենան»,- վստահեցնում է նորընծա պատգամավորը։

Մինչև ընտրություններ «Ելքը» կնախաձեռնի Ընտրական օրենսգրքի փոփոխություններ։ Ալեն Սիմոնյանը մտավախություն չունի, որ Հանրապետականը կտապալի փոփոխությունները, ժողովուրդը իշխանության թիկունքին է։

«Միգուցե նոր ընտրություններից հետո ՀՀԿ-ն ընդհանրապես ներկայացված չլինի կամ մի քանի տոկոս ավել ձայն հավաքի։ Բայց դա նույնպես կորոշի ժողովուրդը։ Իսկ մենք կապահովենք ՀՀԿ յուրաքանչյուր ձայնը»,- հուսադրում է «Ելք»-ականը։

Մհեր Արշակյան