Բողոքի ցույցերն արդարացի են, բայց կարող են քաղաքական տեսանկյունից օգտագործվել նախկին իշխանությունների կողմից՝ կանխելու հնարավոր փոփոխությունները․ Արթուր Սաքունց. ՏԵՍԱՆՅՈՒԹ

«Մեք ունենք նախորդ իշխանությունների ժամանակ ձևավորված դատական համակարգ, որը չունի վստահություն, ամբողջ այդ համակարգը ներկայացնում է նախորդ իշխանության սյունը»,- Factor.am-ի հետ զրույցում ասաց իրավապաշտպան Արթուր Սաքունցը։

Նա անդրադառնալով այս օրերին տեղի ունեցող բողոքի ակցիաներին, ասաց, որ հասկանում է դժգոհող քաղաքացիներին, բայց նաև մտավախություն ունի․ «Բողոքի ցույցերն իրապես արդարացի են, հիմնավոր են, բայց և կարող են քաղաքական տեսանկյունից օգտագործվել նախկին իշխանության ներկայացուցիչների կողմից` կանխելու սպասվող հնարավոր փոփոխությունները»։

Արթուր Սաքունցի խոսքով բողոքի գործողությունները պետք է իրենց մեջ ներառեն գրագետ աշխատանք՝ իրավական հիմնավորմամբ: «Բողոքի հասցեատերը պետք է հստակ լինի՝ գլխավոր դատախազի հրաժարականի պահանջ, խորհրդարանից պահանջել գլխավոր դատախազի հրաժարական։ Որքանով էլ, որ գտնում եմ՝ իրենց պահանջներն իրավացի են, բայց արդյո՞ք ճանապարհի փակումը կարող է հանգեցնել գլխավոր դատախազի հրաժարականին»,- հռետորական հարց հնչեցրեց իրավապաշտպանը։

Անդրադառնալով նոր կառավարության կազմին, ուժային կառույցների նոր ղեկավարներին` Սաքունցը նշեց, որ ոստիկանապետի նշանակման հետ իր անհամաձայնությունն ուժի մեջ է մնում․ «Ես վարչապետի հիմնավորումները ոստիկանապետի նշանակման հետ կապված ընդունեցի ի գիտություն, բայց ես ասացի, որ նախորդ ժամանակահատվածում մարդու իրավունքների խախտումների հետ կապված քննությունը պետք է լինի այն հիմնական խնդիրը, որը պետք է դրվի իշխանության օրակարգում։ Ոստիկանապետից բացի բավական լուրջ հարցեր կան ԱԱԾ տնօրենի հետ կապված. հրապարակումներ կան լուրջ բիզնեսների մասին և մտահոգություն կա՝ արդյո՞ք այդ բիզնեսները չեն իրագործվել պաշտոնական լիազորությունների օգտագործմամբ»։

Հարցազրույցներն ամբողջությամբ՝ տեսանյութում:

Լիլիթ Շաբոյան