13.12.2025 | 22:20
Ֆրանսիան հաղթեց «Մանկական Եվրատեսիլ»-ում
Դավադրությունների տեսությունը պատասխանատվությունից խուսափելու ձև է․ ապաքաղաքական զրույց Դավիթ Ամիրյանի հետ. ՏԵՍԱՆՅՈՒԹ
Հաղորդաշարեր
06.08.2022 | 21:02
Factor TV-ի A-politic հաղորդաշարի հյուրն է հոգեբան Դավիթ Ամիրյանը: Նրա կարծիքով՝ այսօր մի շարք գիտությունների ներկայացուցիչներ, մարդաբաններ, սոցիոլոգներ, տնտեսագետներ հաճախ իրենց հետազոտությունները լիարժեք իրականացնելու համար դիմում են հոգեբանության օգնությանը: Ամիրյանը նշում է, որ սոցիալական գիտություններն այսօր Հայաստանում պատշաճ մակարդակի վրա չեն: Սակայն, մյուս կողմից, ակտիվ չեն նրանք, ովքեր կարող են լինել այլ գիտությունների և, մասնավորապես, սոցիալական հոգեբանության շահառուները՝ բիզնեսների ղեկավարները, քաղաքական գործիչները, լրագրողները:
Ըստ հաղորդման հյուրի՝ վերջին համավարակի հետ կապված, իրադարձությունները ևս մեկ անգամ հաստատեցին, որ մարդիկ շատ հաճախ առաջնորդվում են ոչ թե բանականությամբ կամ գիտելիքներով, այլ իրենց հուզական ընկալումներով: Դա ճանապարհ է բացում դավադրությունների տեսության համար, երբ մարդիկ համոզված են, որ աշխարհը կառավարվում է ինչ-որ կենտրոններից, և բոլոր երևույթները պայմանավորված են այդ առեղծվածային ազդեցությամբ: Հոգեբանը գտնում է, որ նման ընկալումը պատասխանատվությունից խուսափելու ձև է:
Դավիթ Ամիրյանը կարևորում է քննադատական մոտեցումը, որն օգնում է դուրս գալ խմբային մտածողությամբ պայմանավորված «տեղեկատվական փուչիկից», երբ մարդը շփվում է միայն իր համախոհների հետ և փնտրում է տեղեկություններ, որոնք հաստատում են իր համոզմունքները: Եթե կա ինքնուրույն մտածելու ձգտում, ապա տարբեր խմբերում ներառված մարդիկ գտնում են այն, ինչ իրենց միավորում է, և պատրաստ են լսել հակառակ կողմի փաստարկները: Այդ իմաստով, հոգեբանի կարծիքով, Հայաստանի երիտասարդության մոտ վերջին տասը տարում նկատվում են դրական փոփոխություններ, որոնք պայմանավորված են մեր երկրում տեղի ունեցած սոցիալական և քաղաքական տեղաշարժերով:
Մանրամասները տեսանյութում:
