Հարձակումների հեղինակները պետք է պարզվեն. վարչապետը հայտարարեց՝ արտոնյալներ չպետք է լինեն

Կառավարության այսօրվա նիստում վարչապետ Նիկոլ Փաշինյանն անդրադարձավ վերջին շրջանում քաղաքական գործընթացի հետևանքով տեղի ունեցած հարձակումներին: «Մենք դեպքեր ենք ունեցել, որ մեքենաներ են ջարդվել ինչ-որ անձանց կողմից, և ես ակնկալում եմ, որ շատ արագ այդ գործերը քննվեն, այդ հարձակումների հեղինակները պարզվեն»,- շեշտեց վարչապետ Նիկոլ Փաշինյանը՝ դիմելով ՀՀ ոստիկանապետ Վալերի Օսիպյանին:

Կառավարության ղեկավարը նշեց, որ պետք է լուծել նաև տուժած քաղաքացիների հարցերը: «Նրանց ավտոմեքենաները ջարդվել են, և պետք է հասկանալ, թե ով և ինչպես են այդ պատասխանատվությունը կրելու: Բացի այդ, համապատասխան ընթացակարգերով պետք է այդ գործերը բացահայտվեն»,- շարունակեց Կառավարության ղեկավարը:

Նիկոլ Փաշինյանն անդարադրձավ նաև Հերացի փողոցում տեղի ունեցած հայտնի միջադեպին: «Հիմա պարզվում է, որ գործ է հարուցվել կամ չի հարուցվել ու արդյունքում կարճվել է: Ես կարծում եմ, որ այս գործելակերպին պետք է վերջ տանք, երբ որ ինչ-որ արտոնյալ մարդկանց հանդիպելով՝ մենք ի սկզբանե ելնում ենք այն կանխավարկածից, որ այդ քրեական գործերը պետք է կարճվեն»,- ասաց նա:

Կառավարության ղեկավարը նաև ընդգծեց, որ կլինեն շատ հստակ ուղերձներ: «Ես ակնկալում եմ, որ ստուգվի կարճման օրինականությունը, որովհետև եթե այն հրապարակումները, որ մամուլում գրվում է, համապատասխանում են իրականությանը, ակնհայտ է, որ այդ կարճման որոշումը օրենքի հետ որևէ կապ չունի»,- ընդգծեց Փաշինյանը: