Ուկրաինացի ռազմագերիներով գյուղի հրթիռակոծումը Ելենովկայում․ ինչ է հայտնի

Ելենովկա գյուղի գաղութի գնդակոծության հետևանքով, որտեղ պահվում էին ուկրաինացի ռազմագերիները, այդ թվում՝ Մարիուպոլի «Ազովստալ» գործարանի պաշտպանները, զոհվել է 53 մարդ, պնդում են ինքնահռչակ Դոնեցկի ժողովրդական հանրապետության ներկայացուցիչները։ Եվս 75 մարդ, ըստ նրանց, վիրավորվել է։ Ուկրաինան հայտարարել է, որ ռուսական բանակը միտումնավոր հարվածներ է հասցրել գաղութին՝ Կիևին ռազմական հանցագործություններ կատարելու մեջ մեղադրելու համար, գրում է BBC-ի ռուսական ծառայությունը։

Ռուսական վարկած

ՌԴ ՊՆ-ն առավոտյան իր հաղորդագրության մեջ նշել է, որ Դոնեցկի մերձակայքում գտնվող Ելենովկայում գտնվող կալանավայրը, որտեղ պահվում էին գերի ընկած ուկրաինացի զինծառայողները, այդ թվում՝ Ազովից, իբր, հրթիռակոծվել է ամերիկյան HIMARS բազմակի հրթիռային համակարգից։

«Զոհվել է 40 ուկրաինացի ռազմագերի, 75-ը՝ վիրավորվել, բացի այդ, կալանավայրի ութ աշխատակից ստացել է տարբեր ծանրության վնասվածքներ»,- ասվում է հաղորդագրության մեջ։

Հարվածի մասին ավել շուտ հայտնել էին ինքնահռչակ Դոնեցկի հանրապետության իշխանությունները։

Համառուսաստանյան պետական հեռուստառադիոհեռարձակման ընկերության աշխատակից Անդրեյ Ռուդենկոն իր Telegram ալիքում տեսանյութ է հրապարակել, որտեղ երևում են մահացածների այրված մարմիններ և կտրված վերջույթներ, իսկ ՌԻԱ Նովոստիի թղթակիցը ցույց է տվել բեկորներ, որոնք, իբր,պատկանում են HIMARS-ի հրթիռին և հայտնաբերվել են գաղութի տարածքում:

Ուկրաինական վարկած

Ուկրաինական կողմը երկար ժամանակ չէր մեկնաբանում այս պնդումները։ Այնուհետեւ հետևել է Ուկրաինայի զինված ուժերի գլխավոր շտաբի հայտարարությունը։

Նրանք իրենց հերթին պնդում են, որ ռուս զինվորականները ուկրաինացի ռազմագերիներով գաղութը թիրախավորված հրետանային գնդակոծման են ենթարկել ՝ Ուկրաինային ռազմական հանցագործություններ կատարելու մեջ մեղադրելու համար, ինչպես նաև թաքցնելու գերիների խոշտանգումները և այնտեղ կատարված սպանությունները։

Ուկրաինայի Զինված ուժերը չեն հրետակոծում քաղաքացիական ենթակառուցվածքները, առավել ես՝ այն վայրերը, որտեղ պահվում են ռազմագերիները, ասվում է մամուլի հաղորդագրությունում։ Ելենովկայի շրջանում հրետանային հարվածները, ըստ Գլխավոր շտաբի, չեն իրականացվել ուկրաինացի զինվորականների կողմից։ Ուկրաինացի զինվորականները չեն մեկնաբանել հնարավոր զոհերի թիվը։

Ուկրաինայի նախագահի գրասենյակի ղեկավարի խորհրդական Միխայիլ Պոդոլյակը Telegram-ի իր ալիքում նույնպես հայտարարել է, որ «գաղութի վրա մանրակրկիտ ծրագրված հարձակում է տեղի ունեցել»։

Տաթև Ֆռանգյան