09.10.2026 | 21:27
ՀՀ-ն զգալի առաջընթաց է արձանագրել վիզաների ազատականացման ոլորտում․ ԵՄ գնահատման 2-րդ առաքելությունը ՀՀ-ում է
ՈւԵՖԱ-ն հետաքննություն է սկսել թուրք երկրպագուների կողմից «Պուտին» վանկարկումների միջադեպի վերաբերյալ
Քաղաքականություն
29.07.2022 | 12:34
Եվրոպական ֆուտբոլային ասոցիացիաների միությունը (ՈՒԵՖԱ) հայտարարել է թուրք երկրպագուների նկատմամբ կարգապահական հետաքննություն սկսելու մասին։ Հիշեցնենք՝ հուլիսի 27-ին Չեմպիոնների լիգայի որակավորման երկրորդ փուլի «Ֆեներբախչե»-«Դինամո Կիև» խաղի ընթացքում Ֆեներբախչեի երկրպագուները մի քանի անգամ վանկարկել էին Վլադիմիր Պուտինի անունն ու ազգանունը։
ՈւԵՖԱ-ի կայքում հայտնվել է հաղորդագրություն, որում տեղեկացվում է «Ֆեներբախչեի» երկրպագուների ենթադրյալ ոչ պատշաճ պահվածքի վերաբերյալ կարգապահական հետաքննություն սկսելու մասին։
Երկրպագուները «Պուտին» վանկարկումներն արել էին ուկրաինական ակումբի խփած առաջին գոլից հետո։ Հանդիպումից հետո «Դինամոյի» գլխավոր մարզիչ Միրչա Լուչեսկուն, ի նշան բողոքի, հրաժարվել էր մասնակցել հետխաղյա մամուլի ասուլիսին։ Թուրք օգտատերերը «Դինամոյի» ինստագրամյան էջում նաև Պուտինին աջակցող մեկնաբանություններ և ռուսական դրոշներով էմոջիներ են թողնում։
Հավելենք, որ Ռուսաստանի ֆուտբոլային թիմերն այս տարի չեն մասնակցում Չեմպիոնների լիգային. ՈւԵՖԱ-ն արգելել է ՌԴ-ին մասնակցել իր հովանու ներքո գտնվող միջազգային բոլոր մրցաշարերին:
Տաթև Ֆռանգյան
