08.06.2026 | 06:48
1299 ընտրատեղամասերում քվեարկության նախնական արդյունքները․ ԿԸՀ
Մոսկվան դեմ չէ Հայաստանի ու Ադրբեջանի հարաբերությունների կարգավորման գործընթացում նոր դերակատարների ներգրավմանը․ ՌԴ ԱԳՆ
Քաղաքականություն
27.07.2022 | 18:50
Մոսկվան դեմ չէ նոր դերակատարների ներգրավմանը Հայաստանի ու Ադրբեջանի հարաբերությունների կարգավորման գործընթացում, եթե նրանք գործեն առկա եռակողմ համաձայնագրերի շրջանակում։ Այս մասին հայտարարել է ՌԴ ԱԳՆ Տեղեկատվության ու մամուլի դեպարտամենտի փոխտնօրեն Իվան Նեչաևը` ճեպազրույցի ընթացքում պատասխանելով NEWS.ru ադրբեջանամետ լրատվամիջոցի հարցին։
«Ռուսաստանը հանդես է գալիս Հարավային Կովկասը խաղաղության և բարգավաճման գոտու վերածելու օգտին։ Մեր աշխատանքում տարածաշրջանային ուղղությունում մենք առաջ ենք մղում բացառապես կառուցողական օրակարգ և որևէ մեկի հետ չենք պատրաստվում մրցակցել։ Ինչ վերաբերում է Բաքվի ու Երևանի միջև հարաբերությունների կարգավորմանը, մենք մի անգամ չէ, որ նշել ենք, որ համապատասխան ջանքերը պետք է գործադրվեն Ռուսաստանի, Ադրբեջանի և Հայաստանի ղեկավարների 2020 թվականի նոյեմբերի 9-ի, 2021թ-ի հունվարի 11-ի և նոյեմբերի 26-ի եռակողմ հայտարարությունների հիման վրա։ Մենք դեմ չենք ոչ տարածաշրջանային խաղացողների ներգրավմանը, եթե նրանք գործեն նշված համաձայնագրերի շրջանակում և նպաստեն դրանց իրականացմանը»,- ասել է Նեչաևը։
Նա նշել է, որ կարևոր է թույլ չտալ ինչ-որ «ինտրիգներ, որոնց նպատակն է թուլացնել որևէ մեկին կամ «անիվի մեջ փայտ խրել»՝ խոչընդոտել։ Նեչաևի խոսքով՝ Մոսկվան մի անգամ չէ, որ բախվել է նման «պրակտիկայի ԱՄՆ-ի ու ԵՄ-ի կողմից»։
Էմմա Չոբանյան
