Սերգեյ Լավրովի այցը Կահիրե. Ռուսաստանն ընկերներ է փնտրում Աֆրիկայում

Աշխարհում պարենային ճգնաժամը չի առաջացել Կրեմլի մեղքով, իսկ Սև ծովի նեղուցներով ուկրաինական հացահատիկի արտահանման վերաբերյալ Ստամբուլի «քառյակի» համաձայնությանը Ռուսաստանը կհետևի՝ Կահիրեում ելույթ ունենալիս հայտարարել է Սերգեյ Լավրովը։ Նա նաև վստահեցրել է Արաբական երկրների ներկայացուցիչներին, որ կարող են հույս դնել Մոսկվայի վրա կենսական նշանակության մատակարարումների հարցում, գրում է euronews-ը։

« Եթե ինչ-որ մեկն ուզում է օբյեկտիվ լինել, կարող է կարդալ Պարենի համաշխարհային ծրագրի, Պարենի և գյուղատնտեսության կազմակերպության (FAO) վիճակագրությունը, որը նկարագրում է սննդամթերքի շուկայում առկա դժվարությունները։ Դրանք կորոնավիրուսային համաճարակի հետևանք էին, որը խաթարեց մատակարարման շղթաները»,-ասել է Լավրովը։

ՌԴ ԱԳՆ ղեկավարը աֆրիկյան շրջագայությունը սկսել է Եգիպտոսից, որը 80%-ով կախված է ռուսական կամ ուկրաինական հացահատիկից։ Ուկրաինա ռուսական ներխուժման մեկնարկից հետո Արաբական պետությունների լիգայի անդամների մեծ մասը չեզոք դիրք գրավեց, տարածաշրջանում ակտիվ դիվանագիտական ​​մանևրներ են տեղի ունենում արևմտյան առաջնորդների մասնակցությամբ։ Լավրովի այցից առաջ էլ Եգիպտոսի նախագահ Ալ-Սիսին Սաուդյան Արաբիայում բանակցություններ էր վարել Ջո Բայդենի հետ, ինչպես նաև Գերմանիայի կանցլեր Օլաֆ Շոլցի հետ քննարկել գազի և ջրածնի ոլորտում համագործակցությունը։

Մեկնաբանելով հացահատիկի համաձայնագրի մանրամասները, որը Ռուսաստանը և Ուկրաինան առանձին-առանձին կնքել են ՄԱԿ-ի և Թուրքիայի հետ՝ Լավրովն ասել է, որ Սև ծովում հացահատիկի բեռնատար նավերը կհսկվեն մեկ այլ երկրի կողմից ևս, թե որ երկրի՝ կորոշվի ավելի ուշ։

Տաթև Ֆռանգյան