Մենք լուրջ ու վճռական ենք տրամադրված․ Էրդողանը՝ Հայաստանի ու Թուրքիայի հարաբերությունների կարգավորման մասին

Թուրքիայի նախագահ Ռեջեփ Թայիփ Էրդողանը լրատվամիջոցների հետ զրույցում նախօրեին անդրադարձել է նաև Հայաստան-Թուրքիա հարաբերությունների կարգավորման գործընթացին, գրում է TRT Haber-ը։

Էրդողանը, մասնավորապես, նշել է, որ ՀՀ վարչապետ Նիկոլ Փաշինյանի հետ հեռախոսազրույց են ունեցել և շնորհավորանքներ փոխանակել երկու երկրների կրոնական տոների առիթով։

«Իհարկե, մենք նաև խոսել ենք կարգավորման գործընթացի մասին։ Մեր կարմիր գիծն ի սկզբանե Ադրբեջանն էր։ Ադրբեջանի հարցի լուծումից հետո մենք ասացինք՝ կբացե՛նք մեր դռները։ Գոհ եմ նաև, որ Փաշինյանը տարածաշրջանային խաղաղության և համագործակցության վերաբերյալ մեր տեսակետին նման տեսակետներ  է կիսում։ Հիմա արդեն  ակնկալում ենք կոնկրետ քայլեր հռետորաբանությունից դուրս։ Կարգավորման գործընթացում մենք լուրջ ու վճռական ենք տրամադրված։ Մենք ձգտում ենք ամբողջական կարգավորման»,-ասել է Էրդողանը։

Նա նաև նշել է, որ Թուրքիայում ավելի քան 100,000 հայ է ապրում։ «Կան հայեր, որ Թուրքիայի քաղաքացի են, նաև այնպիսիք, որ ուզում են քաղաքացիություն ընդունել»,- ասել է Թուրքիայի նախագահը՝ ևս մեկ անգամ կրկնելով, որ  Ադրբեջանի հետ համակարգված են գործում։

Հիշեցնենք՝ հուլիսի 11-ին ՀՀ վարչապետ Նիկոլ Փաշինյանը հեռախոսազրույց էր ունեցել Թուրքիայի նախագահ Ռեջեփ Թայիփ Էրդողանի հետ։ Իսկ հուլիսի 1-ին Հայաստանի և Թուրքիայի միջև հարաբերությունների կարգավորման գործընթացի հատուկ ներկայացուցիչները  չորրորդ հանդիպումն էին անցկացրել Վիեննայում։

Էմմա Չոբանյան