ԱԱԾ-ն խստացնում է սփյուռքահայերին ՀՀ քաղաքացիության շնորհումը. ինչից է զգուշանում հատուկ ծառայությունը. ՏԵՍԱՆՅՈւԹ

Ազգային անվտանգության ծառայությունը որոշել է խստացնել սփյուռքահայերին ՀՀ քաղաքացիություն տրամադրելու կարգը։ Հատուկ ծառայությունը «Քաղաքացիության մասին» օրենքում փոփոխություններ է առաջարկում, որոնց ընդունվելու դեպքում այլ երկրի քաղաքացի հայերին ՀՀ քաղաքացիություն կարող է տրվել, եթե վերջին 2 տարվա ընթացքում առնվազն 60 օր օրինական հիմքով բնակվել են Հայաստանում։  Երևանում գտնվող որոշ սփյուռքահայեր խնդրահարույց են համարում ԱԱԾ-ի կողմից շրջանառության դրված  նախագիծը, որն, ըստ նրանց, արհեստական բարդացնելու է քաղաքացիություն շնորհելու գործընթացը։

«Քաղաքացիության մասին» օրենքի փոփոխությունների նախագիծը մինչև հուլիսի վերջ հանրային քննարկման է դրվել e-draft կայքում։

Երևանում հանդիպեցինք նաև սփյուռքահայերի, որոնք օրենքի ընդունմանը դեմ չեն։ Համբարձում Մկչրտչյանը մեկ տարի առաջ Դուբայից մշտական բնակություն հաստատելու նպատակով տեղափոխվել է Երևան։ Նա արդեն ստացել է ՀՀ քաղաքացիություն, սակայն նշում է՝ եթե անհրաժեշտ լիներ, ՀՀ-ում կապրեր այնքան մինչև քաղաքացիություն ստանար։

Երևանում ապրելը թանկ է՝ հակադարձում են այլ սփյուռքահայեր, եթե բարձր վարձատրվող աշխատանք ու այլ եկամուտներ չունես, 60  օր ապրել քաղաքացիություն ստանալու համար, գրեթե անհնար է։

ԱԱԾ-ի առաջարկած փոփոխությունները խնդրահարույց է համարում նաև Սփյուռքի գործերի գլխավոր հանձնակատար Զարեհ Սինանյանը։ Նա թեև նշում է, որ նախագիծը օրենքի ուժ ստանալու դեպքում հայրենադարձության համար խոչընդոտներ չի առաջացնի, սակայն բացասական ազդեցություն կարող է ունենալ։

ԱԱԾ-ն նախագծի շուրջ քննադատություններին որևէ կերպ չի արձագանքել։

Մանրամասները` տեսանյութում:

Նարեկ Կիրակոսյան