31.05.2026 | 13:33
Օդի ջերմաստիճանը կբարձրանա 3-4 աստիճանով
Բրյուսելը ԵՄ-ին անդամակցելու բանակցություններ է սկսել Ալբանիայի և Հյուսիսային Մակեդոնիայի հետ
Քաղաքականություն
19.07.2022 | 18:09
Բրյուսելում սկսվել են ԵՄ-ին անդամակցելու հարցով բանակցությունները Ալբանիայի ու Հյուսիսային Մակեդոնիայի հետ։
Եվրահանձնաժողովի նախագահ Ուրսուլա ֆոն դեր Լեյենը Ալբանիայի և Հյուսիսային Մակեդոնիայի վարչապետներ Էդի Ռամայի և Դիմիտար Կովաչևսկիի հետ համատեղ ասուլիսում հայտարարել է, որ «երկու երկրների քաղաքացիներն էլ արժանի են դրան»։
Իր հերթին, Կովաչևսկին ընդգծել է, որ իր երկիրը պատրաստ է անդամակցել ԵՄ-ին, իսկ Ալբանիայի վարչապետը շնորհակալություն է հայտնել ֆոն դեր Լեյենին, ինչպես նաև Գերմանիայի նախկին կանցլեր Անգելա Մերկելին, քանի որ երկու գերմանացի քաղաքական գործիչներն էլ «անողոքաբար պայքարել են Բալկանների համար»։
Միևնույն ժամանակ, ԵՄ արտաքին գործերի և անվտանգության քաղաքականության հարցերով գերագույն հանձնակատար Ժոզեպ Բորելը երկու երկրների հետ բանակցությունների մեկնարկը անվանել է «խոշոր առաջընթաց», որն ազդեցություն կունենա ոչ միայն իրենց, այլև Արևմտյան Բալկանների և ընդհանուր առմամբ ԵՄ-ի համար: Նա հիշեցրել է, որ Սկոպյեն թեկնածուի կարգավիճակ է ստացել 17 տարի առաջ, այդ ժամանակից ի վեր մեծ աշխատանք է տարվել։
Տաթև Ֆռանգյան
