ՆԱՏՕ-ի նախկին հրամանատարը Ուկրաինայի և Ռուսաստանի միջև «սառեցված հակամարտություն» է կանխատեսում

Եվրոպայում ՆԱՏՕ-ի միացյալ զինված ուժերի նախկին գլխավոր հրամանատար Ջեյմս Ստավրիդիսը կանխատեսում է Ուկրաինայի և Ռուսաստանի Դաշնության միջև հակամարտության զարգացումը կորեական սցենարով։ Ուկրաինայում պատերազմը կարող է ավարտվել 4-6 ամսից, մինչդեռ ռազմական գործողությունների ավարտից հետո իրավիճակը կարող է մոտ լինել Կորեական պատերազմի արդյունքներին, ասել է նա ամերիկյան 77WABS ռադիոկայանի եթերում։ Նա մատնանշել է կողմերի միջև ռազմականացված գոտու, շարունակվող թշնամանքի և «սառեցված հակամարտության» հավանականությունը։

Ռուսաստանի նախագահ Վլադիմիր Պուտինի ռազմական ծրագրերն առանձնապես արդյունավետ չեն եղել,  նրան հաջողվել է գրավել միայն փոքր տարածքներ՝ Ուկրաինա ներխուժման սկզբում լայնածավալ մտադրությունների համեմատ, ասել է նա։ Իր հերթին, «ուկրաինացիները շատ ուժեղ դիմադրում են», բայց ոչ ոք չի կարող դիմակայել երկար ամիսներ շարունակվող ռազմական հակամարտությանը, հավելել է ՆԱՏՕ-ի ուժերի նախկին հրամանատարը։

Կորեական պատերազմը տևեց 1950-ից մինչև 1953 թվականը և ավարտվեց Հյուսիսային և Հարավային Կորեաների միջև զինադադարով, մինչդեռ պաշտոնական խաղաղության պայմանագիր դեռ ստորագրված չէ, և պաշտոնապես երկու երկրները դեռ պատերազմի մեջ են:

Հիշեցնենք, ռուսական բանակը Վլադիմիր Պուտինի հրամանով փետրվարի 24-ից փաստացի պատերազմ է սկսել Ուկրաինայում։ Մի քանի շաբաթ անց Մոսկվան հայտարարեց, որ մտադիր է կենտրոնացնել իր ուժերը Ուկրաինայի արևելյան շրջանների գրավման վրա։

Տաթև Ֆռանգյան