Հասարակություն
16.07.2022 | 21:00Factor TV-ի A-politic հաղորդաշարի հյուրն է Հայաստանի պետական սիմֆոնիկ նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը:
Նրա կարծիքով՝ երաժշտությունն իսկապես կարող է աշխարհը փոխել դեպի լավը՝ ի հեճուկս այն հանգամանքի, որ մարդկության պատմության ընթացքում բազմաթիվ չարագործներ սիրել և հասկացել են դասական երաժշտությունը. ամեն ինչ պայմանավորված է նրանով, թե ո՞վ է ընկալում երաժշտական գլուխգործոցները: Այն փաստը, որ դրանք լավագույն կատարումներով համացանցի միջոցով մատչելի են դարձել միլիոնավոր երաժշտասերների համար, դիրիժորը դրական է համարում: Ժամանակակից մարդն իր տանը դասական երաժշտության հետ ուղիղ շփվելու հնարավորություն է ստացել:
Սերգեյ Սմբատյանը համոզված է, որ հնարավոր է՝ ապրելով Հայաստանում, դառնալ միջազգային կարգի երաժիշտ, միևնույն ժամանակ, նա կարծում է, որ ժամանակակից հայկական մշակույթը «վերաթարմացման» կարիք ունի. այն պաշարը, որը ստեղծվել է խորհրդային տարիներին, արդեն սպառվում է: Այդ տեսանկյունից՝ հաղորդման հյուրը կարևոր է համարում, որ Հայաստանում աշխատեն և դասավանդեն երաժշտական արվեստի համաշխարհային ճանաչում ունեցող վարպետները:
Դիրիժորը կարևորում է երաժիշտ կատարողի և հանդիսատեսի անմիջական շփումը, որն, ըստ էության, ընդհատվել էր համավարակի ժամանակահատվածում: Համերգասրահում, ի տարբերություն ձայնագրման տաղավարի, սխալները շտկելու հնարավորություն չկա, սակայն կենդանի կատարման ժամանակ կարևոր է այն էներգետիկան, որը կատարողից փոխանցվում է ունկնդրին: Սմբատյանը վստահ է, որ երաժշտական լայնածավալ կտավները պահանջարկ ունեն ժամանակակից աշխարհում, և ստեղծագործությունները կրճատելու և խեղելու միջոցով ավելի պարզունակ դարձնելու անհրաժեշտություն առայժմ չկա:
Զրույցն ամբողջությամբ՝ տեսանյութում։
Արամ Աբրահամյան
