Էրդողանի ձեռքը երկար է․ հոլանդացի լրագրողը Թուրքիային է մեղադրում Իրաքի Քուրդիստանից իր արտաքսման մեջ

Հոլանդացի լրագրող Ֆրեդերիկե Գեերդինքը հայտարարել է, որ իրեն վտարել են Իրաքի Քուրդիստանի ինքնավար շրջանից՝ այդ ամենում մեղադրելով Թուրքիայի նախագահ Ռեջեփ Թայիփ Էրդողանին, գրում են թուրքական լրատվամիջոցները։

Գեերդինքը ավելի քան մեկ տասնմյակ զբաղվում է Քուրդիստանի աշխատավորական կուսակցությամբ, հաճախ է ճանապարհորդում ու նյութեր հաղորդում Իրաքյան Քուրդիստանից։

Թուրքական կառավարությունն էլ  տասնամյակներ շարունակ ճնշում է այն անձանց, որոնք համակրում, կամ գործում են արգելված խմբի համար, որը ճանաչվել է ահաբեկչական կազմակերպություն Միացյալ Նահանգների և Եվրամիության կողմից:

Լրագրողը ուղևորվել  էր Քոբանի՝ Սիրիայի քրդաբնակ քաղաքը, որը գտնվում է Թուրքիայի սահմանի մոտ, երբ նրան կանգնեցրել են իշխանությունները։

«Ինձ արտաքսել են Իրաքի Քուրդիստանի շրջանից։ Ես գրեթե հատել էի Սիրիայի հյուսիս-արևելյան սահմանը, երբ հանկարծ… Ինձ ոստիկաններով մեքենա նստեցրին և բերեցին Էրբիլի օդանավակայան, որտեղ ես հիմա եմ։ Էրդողանի ձեռքը երկար է»,-թվիթերյան իր էջում գրել է լրագրողը։

Նիդերլանդաբնակ լրագրողը, երկար տարիներ մամուլի միակ արտասահմանյան ներկայացուցիչն էր, որը լուսաբանում էր Թուրքիայի քրդաբնակ հարավ-արևելքը, ձերբակալվել էր Թուրքիայում  2015 թ-ի հունվարին և թվականի ապրիլին կանգնել էր դատարանի առաջ՝ նախքան նույն տարվա սեպտեմբերին վտարվելը երկրից:

Գեերդինքը շարունակում է իրավական պայքարը Թուրքիա մուտքի իր արգելքը վերացնելու համար։

Ըստ Նիդերլանդների ANP լրատվական գործակալության էլ՝ արտաքին գործերի նախարարության խոսնակը նշել է, որ Էրբիլում գլխավոր հյուպատոսը «սերտ կապի մեջ» է լրագրողի հետ։

«Մենք կարծում ենք, որ լրագրողները պետք է կարողանան իրենց աշխատանքը կատարել աշխարհի ցանկացած կետում, այդ իսկ պատճառով մենք ընդգծում ենք մամուլի ազատության կարևորությունը»,- ասել է նա։

Նշվում է նաև, որ Բաղդադում Նիդեռլանդների դեսպանն լրագրողի հարցով կապ է հաստատել նաև Իրաքի ԱԳ նախարարի հետ։

Էմմա Չոբանյան