Ոտքը կորցրած լեյտենանտին զրկել են հատուցումից. նա արդարություն է պահանջում. ՏԵՍԱՆՅՈՒԹ

47-ամյա պահեստազորի սպա, լեյտենանտ Արամ Քալանթարյանը մասնակցել է 44-օրյա պատերազմին, կռվել Մարտակերտում, վիրավորվել ու կորցրել ձախ ոտքը: Ծնկից ներքև ամպուտացված ոտքի փոխարեն պրոթեզ է։ Վիրավորվելուց հետո սկզբնական շրջանում ստացել է 2-րդ կարգի ընդհանուր հիվանդության, ապա` զինհաշմանդամի կարգավիճակ, Զինծառայողների Ապահովագրության Հիմնադրամից նշանակվել է հատուցում։ ՊՆ զինծառայողների սոցիալական պաշտպանության վարչությունից ստացել է հավաստիացում, որ հատուցումը վճարվելու է ամեն ամիս, 20 տարի անընդմեջ։ Սակայն վերջերս հաշմանդամության վերափորձաքննության ժամանակ հաշմանդամության 2-րդ կարգը փոխարինվել է 3-րդով, ինչը նշանակում է, որ դադարեցվել են նաև հիմնադրամի հատուցումները։ Այս մասին Արամն ահազանգել էր ֆեյսբուքյան գրառմամբ։ Վերափորձաքննության ընթացքում Արամին ներկայացրել են ցուցակ, ըստ որի՝ մեկ ոտքի բացակայության դեպքում 2-րդի փոխարեն տրվում է 3-րդ կարգ, եթե այլ ուղեկցող հիվանդություններ չկան։ Այդ ժամանակ էլ ասել են, թե դրական տեղաշարժ կա՝ համարելով, որ վերքն արդեն բուժված է․ բայց Արամը հարց է բարձրացնում․ ինչպե՞ս, եթե կորցրել է ձախ ոտքը։

Աշխատանքի և սոցիալական հարցերի նախարար Նարեկ Մկրտչյանն ասում է՝ ծանոթ է խնդրին, այն ցավոտ է, սակայն հաշմանդամության կարգի փոփոխությունը քաղաքական որոշման հետևանք չէ, այլ նրա, որ Արամի առողջության մեջ դրական տեղաշարժ կա։

Իրավապաշտպան Ժաննա Ալեքսանյանի կարծիքով պետությունը ստորացնում է զինհաշմանդամներին, հաշվի չի առնում, որ հաշմանդամությունը ձեռք է բերվել մարտի դաշտում և ոչինչ չի անում զոհված զինծառայողների ընտանիքների համար։

Մանրամասները՝ տեսանյութում։

Արփի Հակոբյան