22.04.2026 | 16:07
Մինչ այս պահը 3 կուսակցություն է ընտրություններին մասնակցելու փաստաթուղթ ներկայացրել. ԿԸՀ խոսնակ․ ՏԵՍԱՆՅՈՒԹ
Թբիլիսիում ԱՄՆ դեսպանը կտրուկ է արձագանքել Վրաստանին պատերազմի մեջ ներքաշելու փորձերի մասին հայտարարություններին
Քաղաքականություն
30.06.2022 | 22:50
Թբիլիսիում ԱՄՆ դեսպան Քելի Դեգնան կտրուկ է արձագանքել Վրաստանին պատերազմի մեջ ներքաշելու փորձերի մասին հայտարարություններին, փոխանցում է Նովոստի Գրուզիան։
«Ես ուզում եմ պատասխանել այս նենգ հորինվածքներին, որոնք, ինչպես երևում է, դեռ շարունակվում են… Կարծես թե դրանք վերցված են անմիջապես ՌԴ Անվտանգության դաշնային ծառայության ապատեղեկատվության ձեռնարկից։ Բայց թույլ տվեք հստակ ասել՝ ԱՄՆ-ը չի փորձում Վրաստանին ներքաշել Ուկրաինայի պատերազմի մեջ, ԱՄՆ-ը չի ցանկանում, որ այս պատերազմն ընդլայնվի։ ԱՄՆ-ն ամեն ինչ անում է՝ պատերազմը հնարավորինս շուտ դադարեցնելու համար։ Պուտինն այն մարդն է, որը սկսել է այս դաժան և ագրեսիվ պատերազմն Ուկրաինայի դեմ, և Պուտինը կարող է վերջ տալ դրան»,- ասել է դեսպանը։
Դեգնան նշել է, որ ԱՄՆ-ը և Եվրոպան Վրաստանի բարեկամներն են և վերջին 30 տարիների ընթացքում ամեն ինչ անում են՝ Վրաստանին եվրաինտեգրման ճանապարհին աջակցելու համար։
«Մենք կշարունակենք դա անել։ Կարծում եմ՝ շատ կարևոր է, որ վրացիները հիշեն, որ Ռուսաստանը գրավում է ձեր տարածքների 20%-ը, Ռուսաստանը փորձել է ոչնչացնել ձեր լեզուն, Ռուսաստանը թալանել է ձեր եկեղեցիները և դրանք վերածել ախոռների։ Եթե հարցեր կան, թե ինչ է նշանակում ռուսական բարեկամությունը Վրաստանի հետ, պարզապես նայեք բաժանարար գծին։ Ձեր բարեկամները գտնվում են ԱՄՆ-ում և Եվրոպայում, իսկ Վրաստանի համար սա խաղաղության, կայունության և բարգավաճման ճանապարհն է»,- հայտարարել է ամերիկացի դիվանագետը։
Տաթև Ֆռանգյան
