15.01.2025 | 23:34
Իսրայելն ու ՀԱՄԱՍ-ը հրադադարի համաձայնագիր են ստորագրել
ԵՄ-ն մոտեցել է փոխզիջումային համաձայնության՝ Կալինինգրադի շուրջ ՌԴ-ի հետ հակասությունները մեղմելու համար. Reuters
Քաղաքականություն
30.06.2022 | 14:06
Առաջիկա օրերին Լիտվայով դեպի Կալինինգրադ բեռնափոխադրումը կարող է կարգավորվել։ Այս մասին հայտնում է Reuters-ը։
Իրավիճակին ծանոթ երկու աղբյուրների փոխանցմամբ՝ եվրոպացի պաշտոնյաները հակված են Վիլնյուսի հետ փոխզիջումային համաձայնության, որպեսզի թուլացնեն տարածաշրջանում լարված իրավիճակը։
ԵՄ-ն Լիտվայի հետ քննարկում է պատժամիջոցների հնարավոր չեղարկումը, որոնց պատճառով Բալթյան երկիրը դադարեցրել է տարանցումը դեպի ՌԴ Կալինինգրադի մարզ՝ մտավախություն ունենալով, որ Կրեմլը կարող է դիմել վեճը ռազմական ճանապարհով լուծելուն։
Սահմանափակումների վերացմամբ հետաքրքրված երկրներից մեկը, ըստ Reuters-ի, Գերմանիան է։ Քանի որ գերմանացի զինվորականները տեղակայված են Լիտվայում, Բեռլինը մտավախություն ունի, որ կարող է ներքաշվել հակամարտության մեջ: Պատճառներից մեկն էլ Գերմանիայի մտավախությունն է, որ Ռուսաստանը կդադարեցնի գազի մատակարարումը։
«Պուտինն ազդեցության ավելի մեծ լծակների ունի, քան մենք։ Մեր շահերից է բխում փոխզիջում գտնելը»,- ասել է Reuters-ի աղբյուրը։
Գործակալության տեղեկությունների համաձայն՝ որոշման մասին կարող է հաղորդվել հուլիսի 10-ին։
Տաթև Ֆռանգյան
