25.06.2026 | 18:47
ՍԴ-ում պատասխանողի ներկայացուցիչները կլինեն Վահագն Հովակիմյանը և Նունե Հովհաննիսյանը
Թուրքիան Շվեդիայից և Ֆինլանդիայից ակնկալում է «ահաբեկչության մեջ կասկածվող քրդերի և գյուլենականների արտահանձնում»
Քաղաքականություն
29.06.2022 | 17:19
Անկարան Մադրիդում ձեռք բերված պայմանավորվածության շրջանակում հետամուտ է լինելու Ֆինլանդիայից և Շվեդիայից 33 անձի արտաքսմանը, որոնց մեղադրում է ահաբեկչության մեջ, գրում է «Անադոլու» գործակալությունը։
Այսօրվա դրությամբ՝ Թուրքիան պաշտոնական Հելսինկիին 6 դիմում է ուղարկել PKK-ի անդամների և 6 դիմում՝ Ֆեթուլլահ Գյուլենի աջակիցների արտահանձնման հարցով։ Միաժամանակ, Անկարայից Ստոկհոլմ է ուղարկվել 21 դիմում, այդ թվում՝ PKK-ի 11 անդամի և Գյուլենի 10 կողմնակցի համար։ Այս մասին հայտարարել է Թուրքիայի արդարադատության նախարար Բեքիր Բոզդաղը՝ մեկնաբանելով նախօրեին Մադրիդում Թուրքիայի, Ֆինլանդիայի և Շվեդիայի միջև ստորագրված եռակողմ հուշագիրը։
Նախարարի խոսքով՝ այդ գործերն արդեն քննարկվում են սկանդինավյան երկրների կողմից, և արտահանձնման մասին կրկնակի դիմում չի լինելու։
«Մենք միայն կհիշեցնենք դրանց գոյության մասին»,- ասել է Թուրքիայի արդարադատության նախարարության ղեկավարը։
Նա նաև ասել է, որ նախօրեին ստորագրված հուշագիրն ամենևին չի նշանակում, որ Սկանդինավյան երկու երկրների՝ դաշինքին միանալու գործընթացն ավարտված է։
Բոզդաղը նշել է, որ «Թուրքիան կշարունակի քայլեր ձեռնարկել, որպեսզի նշված երկրները դադարեն լինել ահաբեկիչների «հենակետ» և արյունալի կառույցներին օգնությունը դադարեցվի»։
Էմմա Չոբանյան
