Վալերի Օսիպյանը կնշանակվի ՀՀ ոստիկանության պետ, Արթուր Վանեցյանը՝ ԱԱԾ պետ․ Նիկոլ Փաշինյան. ՏԵՍԱՆՅՈՒԹ

Ես հույս ունեմ, որ պարոն Օսիպյանը կարդարացնի ՀՀ քաղաքացիների հույսերը․ իր ֆեյսբուքյան էջով ուղիղ հեռարձակմամբ վայրկյաններ առաջ հայտարարեց Նիկոլ Փաշինյանը։ 

 Նիկոլ Փաշինյանը հայտնեց, որ   որոշում է կայացրել ԱԱԾ Երևան քաղաքի վարչության պետի տեղակալ Վալերի Օսիպյանին նշանակել ՀՀ ոստիկանության պետի պաշտոնում, քանի որ հեղափոխությունից առաջ ինքը և Օսիպյանը, քաղաքացիները եւ Օսիպյանը   ֆիզիկապես գտնվում էին փշալարերի տարբեր կողմերում: «Այս որոշումը սիմվոլիկ նշանակում պետք է ունենա։ Այն խորհրդանշելու է, որ բոլորն այլևս միևնույն կողմում են և փշալարերի կուլտուրան պետք է վերացվի: Այսօր ոստիկանությունից շատ բան է կախված: Ոստիկանությունից կախված է իրավակարգը, օրինականությունը,ոստիկանությունից կախված է  քաղաքացու ինքնազգացողույունը և ես շատ հստակ խնդիներ եմ դրել, որ Հայաստանի Հանրապետության քաղաքացիները պետք է իրենց զգան վստահ, պաշտպանված, և որևէ բան չպետք է սպառնա նրանց այս զգացողությանը»,- ասաց Նիկոլ Փաշինյանը:  

Նա նաեւ հայտնեց, որ ԱԱԾ տնօրենի պաշտոնում  նշանակվել է Արթուր Վանեցյանը, ով նախկինում զբաղեցրել է Երևան քաղաքի Ոստիկանության վարչության պետի տեղակալի պաշտոնը։ 

 «ԱԱԾ գործառույթները երկար տարի խեղաթյուրված են եղել։ Այն խնդիրները, որոնք կապված են հետախուզության և հակահետախուզության հետ, ԱԱԾ-ն պետք է լիարժեք կատարի», – նշեց Փաշինյանը՝ նկատելով, որ  ԱԱԾ-ն է զբաղվում մաքսային գործառույթներով, մաքսանենգության հետ կապված հանցագործություններով։

«Առաջնային խնդիրներից պետք է լինի բացառել որևէ չարաշահում մաքսային ոլորտում, նաեւ պայքարը կոռուպցիայի դեմ։ Պետք է արմատախիլ անել կոռուպցիան։ ՀՀ քաղաքացիները պետք է դա ամեն օր զգան։ Մեզ պետք են արդյունքներ, ժողովրդին պետք են տեսանելի արդյունքներ», – ընդգծեց ՀՀ վարչապետը։