09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
G7-ը 4,5 միլիարդ դոլար կհատկացնի պարենային ճգնաժամի դեմ պայքարելու համար
Քաղաքականություն
28.06.2022 | 19:58
Բավարիայում անցկացվող G7-ի (Մեծ յոթնյակ) գագաթնաժողովի վերջին օրը մասնակից երկրների ղեկավարները պայմանավորվել են լրացուցիչ 4,5 միլիարդ դոլար հատկացնել՝ Ուկրաինայում ռուսական ագրեսիայի հետևանքով առաջացած սննդամթերքի համաշխարհային դեֆիցիտի դեմ պայքարելու համար, փոխանցում է BBC-ի ռուսական ծառայությունը։
Նրանք նաև հորդորել են պարենային մեծ պաշարներ ունեցող երկրներին օգնել՝ լուծել ճգնաժամը և զերծ մնալ սննդամթերքի հետագա գնումներից՝ համաշխարհային գների է՛լ ավելի արագ աճ չհրահրելու համար։
«Մենք կոչ ենք անում խոշոր բաժնետոմսեր ունեցող գործընկերներին, ինչպես նաև մասնավոր ընկերություններին սննդամթերքը հասանելի դարձնել՝ առանց շուկան մանիպուլյացիայի ենթարկելու»,- ասվում է G7-ի գագաթնաժողովի եզրափակիչ կոմյունիկեում։
«Եվրոպայի հացի զամբյուղ» համարվող Ուկրաինայում պատերազմն ու ռուսական զորքերի կողմից նավահանգիստների շրջափակումը հանգեցրել է հացահատիկի և արևածաղկի ձեթի լիակատար պակասի։ Աֆրիկյան որոշ երկրներում արդեն իսկ կախվել է սովի իրական վտանգը:
G7-ը, որը ներառում է ԱՄՆ-ը, Կանադան, Մեծ Բրիտանիան, Գերմանիան, Ֆրանսիան, Իտալիան և Ճապոնիան, դիմել է նաև Ռուսաստանի ղեկավարությանը՝ կոչ անելով անհապաղ վերացնել Սև ծովի նավահանգիստների շրջափակումը, որտեղից արտահանվում է ուկրաինական պարեն: Յոթնյակի ղեկավարները Կրեմլին մեղադրում են նաև Ուկրաինայի գյուղատնտեսության ոլորտը թալանելու մեջ։
Ռուսաստանը չի ճանաչում իր պատասխանատվությունը պարենային ճգնաժամի համար՝ հայտարարելով, որ համաշխարհային շուկա ապրանքների մատակարարման ձախողման մեղավորն Արևմուտքի սահմանած հակառուսական պատժամիջոցներն են։
Տաթև Ֆռանգյան
