Ադրբեջանը հրաժարվել է երկաթուղու կառուցումը սկսելու պայմանավորվածությունից։ Այսօր հրավիրած առցանց ասուլիսում հայտարարեց Նիկոլ Փաշինյանը` անդրադառնալով կոմունիկացիաների ապաշրջափակման վերաբերյալ հարցին։
«Բրյուսելում Ադրբեջանի նախագահի հետ հայտարարեցինք, որ պայմանավորվածություն է ձեռք բերվել, որ պետք է սկսել երկաթուղու շինարարությունը։ Սակայն Ադրբեջանը, ըստ էության, հրաժարվեց այդ պայմանավորվածությունից։ Դրանից հետո առաջարկ եղավ ձեռք բերված պայմանավորվածություններն արձանագրել գրավոր փաստաթղթով, որի նախագիծը ներկայացրել էր եռակողմ աշխատանքային խմբի ռուսաստանյան կողմի համանախագահող Ալեքսեյ Օվերչուկը։ Հայկական կողմը պատրաստակամություն հայտնեց ստորագրել այն, իսկ ադրբեջանականը հրաժարվեց»,- ասաց Փաշինյանը։
Նրա խոսքով` ադրբեջանական կողմը մերժել է նաև հայկական կողմի առաջարկած փաթեթային տարբերակը` ավտոմոբիլային և երկաթուղային ճանապարհների բացման վերաբերյալ։
Վարչապետը հիշեցրեց, որ նախկինում հայտարարել էր` ՀՀ-ի համար անընդունելի է Ադրբեջանի նախագահ Իլհամ Ալիևի այն ասածը, թե ՀՀ-ով անցնող ճանապարհները պետք է գործեն նույն տրամաբանությամբ, ինչ Լաչինի միջանցքը։ «Եռակողմ հայտարարության մեջ կա մեկ միջանցքի հիշատակում, և դա Լաչինի միջանցքն է, որը գտնվում է ռուս խաղաղապահների վերահսկողության ներքո։ Խոսքն այն մասին է, որ Ադրբեջանի արևմտյան շրջանները պետք է հնարավորություն ունենան Նախիջևանի հետ տրանսպորտային կապ հաստատել»,- ասաց Փաշինյանը։
