«Փարքինգի արքաները»․ ինչպես ազատագրել Երևանի զավթված ավտոկայանատեղերը․ ՏԵՍԱՆՅՈՒԹ

Մայրաքաղաքում ավտոմեքենա կայանելու հարցը շատ տնտեսվարողներ որոշել ու սեփական նախաձեռնությամբ են «լուծել»։ Դարբնի ձեռագործ աշխատանք երկաթե արգելապատնեշներից մինչև պլաստիկե արկղեր, նույնիսկ՝ աղբով լցված պարկեր։ Ճանապարհների մայթեզրյա հատվածները սեփականաշնորհել են, ով ինչով ու ինչպես կարողացել է։

Երևանի քաղաքապետարանի առևտրի և ծառայությունների վարչությունը պարբերաբար շրջայցեր է իրականացնում ու առգրավում ճամփեզրերին ապօրինի տեղադրված առարկաները։ Թեպետ սա խնդրին վերջնական լուծում չի տալիս, այդուհանդերձ, իրավիճակը շատ ավելի վատ կլիներ, եթե այդ շրջայցերը չիրականացվեին՝ ասում է քաղաքապետարանի ներկայացուցիչը։

Նման պատկերը բնորոշ է Կենտրոն վարչական շրջանին, որովհետև հենց այստեղ է ավելի խնդրահարույց կայանման տեղ գտնելը։

Անգամ վարձակալության տրված տարածքներում օրենքն արգելում է տարբեր առարկաներով տարածքի սահմանազատում, նման դեպքերում տարածքը պետք է սահմանազատվի բացառապես գծանշումներով ու ճանապարհային նշանններով։ Օրինակ՝ այս ցուցանակը հուշում է, որ տարածքը ծառայողական մեքենաների համար է։

Factor TV-ն նաև գրավոր հարցում է ուղարկել Ճանապարհային ոստիկանություն, որտեղից մեզ տեղեկացրեցին, որ ՀՀ Ոստիկանության պարեկային ծառայության կողմից ապօրինի ավտոկայանատեղի շահագործելու դեպքեր hայտնաբերելիս իրավախախտում կատարած անձինք ներկայացվում են Ոստիկանության տարածքային բաժիններ, որտեղ իրավախախտման վերաբերյալ նախապատրաստվում են համապատասխան նյութեր և Ոստիկանության տարածքային ստորաբաժանումների կողմից սահմանված կարգի համաձայն նախապատրաստված նյութերն ուղարկվում են Պետական եկամուտների կոմիտե՝ հետագա ընթացքը որոշելու համար:

Մինչ քաղաքապետարանն ու Ոստիկանությունը շրջայցեր են անում, ֆեյսբուքյան օգտատերերն ահազանգում են՝ խնդիրը մշտական է և գրեթե անլուծելի։

Մանրամասները՝ տեսանյութում։

Սաթենիկ Հայրապետյան