13.05.2026 | 15:05
Մասիս-Էջմիածին խճուղում ծեծկռտուքի գործով 9 անձ է ձերբակալվել․ կրակոցներ չեն հնչել․ ՆԳՆ
Ասում են՝ «մեր երեխան մտածելուց ուժեղ չի, հումանիտար գծով գնաց». ապոլիտիկ զրույց Սմբատ Գոգյանի հետ․ ՏԵՍԱՆՅՈՒԹ
Հասարակություն
25.06.2022 | 21:02
Factor TV-ի A-politic հաղորդաշարի հյուրն է «Քառակուսի» կրթական հիմնադրամի համահիմնադիր և տնօրեն Սմբատ Գոգյանը: Նրա կարծիքով՝ քննդատական մտածողությունը պետք է նախևառաջ հիմնված լինի ինքնավերլուծության վրա, երբ մարդը քննում է սեփական արարքներն ու խոսքերը: Երբ նման մոտեցումը բացակայում է, հասարակությունը բևեռանում է, բաժանվում է աղանդների, տարբեր հայացքների և ապրելակերպի մարդիկ սկսում են իրար մեղադրել:
Ըստ հաղորդման հյուրի՝ քննադատական մտածողություն սովորելու լավագույն ձևերից է մաթեմատիկան: Բայց սկզբունքորեն դրան կարող է նպաստել ցանկացած առարկա, ցանկացած տեքստի վերլուծություն: Սմբատ Գոգյանն այդ առումով կարևորում է ազատ երևակայությունը և ուսուցիչների կողմից դրա խրախուսումը: Առանձին անդրադարձ է կատարվում մանկավարժական կադրերի ոչ պատշաճ որակին, ինչպես նաև սակավությանը: Մինչև այդ հարցերը չլուծվեն, նշում է կրթական հիմնադրամի տնօրենը, անիմաստ է խոսել կրթական բարեփոխումների մասին:
Հաղորդման հյուրն առաջարկում է դպրոցական դասավանդման մեջ հաշվի առնել, թե ինչ կրիչներով են այսօրվա պատանիները, երիտասարդները տեղեկատվություն ստանում: Այլևս առանձնապես իմաստ չկա դասարանում թեման բացատրել, որպես տնային աշխատանք հանձնարարել դասագրքի նյութը, այնուհետև դաս հարցնել: Սմբատ Գոգյանն առաջարկում է կարճ՝ 5 րոպեանոց տեսագրություններ անել, որոնք աշակերտները տանը կնայեն, այնուհետև այդ նյութը դասարանում կքննարկեն:
Մանրամասները՝ տեսանյութում:
