14.11.2024 | 10:27
Արտարժույթների փոխարժեքները՝ նոյեմբերի 14-ի դրությամբ
Արարատ Խանդոյանը դատապարտվեց 3 տարի 6 ամիս ազատազրկման
Հասարակություն
27.06.2017 | 16:10
Այսօր Կենտրոն և Նորք-Մարաշ վարչական շրջանների ընդհանուր իրավասության դատարանում հնչեցրած իր վերջին խոսքում Արարատ Խանդոյանը պնդել է, որ անմեղ է, որ անցած 11 ամիսների ընթացքում իրավապահներն այդպես էլ չկարողացան ապացուցել իր մեղքը ու խնդրել է արդարացնել իրեն և ազատ արձակել հենց դատարանի դահլիճից։
«Չեմ հավատում, որ մի շարք աղմկահարույց քաղաքական գործեր քննած դատավոր Մնացական Մարտիրոսյանն արդար որոշում կկայացնի: Նա ի վիճակի չէ արդարադատություն իրականացնել: Այսօր Հայաստանի Հանրապետությունը ղեկավարում է քրեաօլիգարխիկ համակարգը, և արդարություն Հայաստանում չի լինի: Հայաստանի բանտերում քաղբանտարկյալներ կան»,- դատարանում հայտարարել է Արարատ Խանդոյանը:
Հիշեցնենք, որ 43-ամյա Արարատ Խանդոյանը ոստիկանության ՊՊԾ գնդի տարածքը գրաված «Սասնա ծռեր» խմբի անդամ՝ «Միայնակ գայլ» մականունով հայտնի Արայիկ Խանդոյանի եղբայրն է:Նա բերման էր ենթարկվել 2016թ. հուլիսի 20-ին Խորենացի փողոցից: Ըստ մեղադրանքի, նա մասնակցել է ՊՊԾ գնդի տարածքը գրաված զինված խմբին աջակցելու համար Խորենացի փողոցում անցկացված բողոքի ակցիաներին և այդ ընթացքում բռնություն է գործադրել ոստիկանության աշխատակիցների նկատմամբ՝ հարվածել է, քաշքշել ու փորձել խլել ոստիկանի վահանը:
Դատավոր Մնացական Մարտիրոսյանը հրապարակել է դատավճիռը, համաձայն որի՝ Արարատ Խանդոյանը մեղավոր է ճանաչվել և դատապարտվել 3 տարի 6 ամիս ազատազրկման:
