ՀՀ նախկին նախագահ Արմեն Սարգսյանի որդին ցանկացել է գնել ռուսական McDonald’s ցանցի ակտիվները․ Forbes

ՀՀ նախկին նախագահ Արմեն Սարգսյանի որդին ցանկացել է գնել McDonald’s-ի ռուսական ցանցի ակտիվները։ Մայիսի 19-ին McDonald’s-ը, արևմտյան պատժամիջոցների ֆոնին, հայտարարել է ռուսական ակտիվները գործարար Ալեքսանդր Գովորին վաճառելու մասին։

Forbes-ին հայտնի է դարձել, որ բացի Ալեքսանդր Գովորից՝ McDonald’s-ի ռուսական ցանցի նոր սեփականատիրոջ համար մրցույթին մասնակցել է ևս հինգ անձ։ Դիմողների թվում են եղել ՀՀ նախկին նախագահ Արմեն Սարգսյանի որդին, ռեստորատորներ Արկադի Նովիկովը և Անտոն Պինսկին, Ռուսաստանում McDonald’s-ի ֆրանչայզերներ Ռոստիսլավ Օրդովսկի-Տանաևսկի Բլանկոն և Կայրատ Բորանբաևը, Kismet Capital Group-ի ներդրող և հիմնադիր Իվան Տավրինը:

Մայիսի 19-ին McDonald’s-ը հայտարարել է ռուսական ակտիվների վաճառքի մասին Նովոկուզնեցկից «Յուժկուզբասուգոլ» ածխային ընկերության նախկին համասեփականատեր Ալեքսանդր Գովորին, որը ղեկավարել է Սիբիրում McDonald’s-ի 25 ռեստորանները: Գործարքը նախաձեռնել են ռեստորանային բիզնեսի ամերիկացի սեփականատերերը։ Ապրիլին Արաբական Միացյալ Էմիրություններում նրանք մի շարք հարցազրույցներ են անցկացրել պոտենցիալ գնորդների հետ:

Բանակցությունների ընթացքին ծանոթ երկու աղբյուրներ Forbes-ին հայտնել են, որ վեց հավակնորդներից մեկը եղել է նաև Հայաստանի նախկին նախագահ Արմեն Սարգսյանի որդին։ Զրուցակիցների խոսքով՝ պետության նախկին ղեկավարի ընտանիքը գրասենյակ ունի Լոնդոնում։ Արմեն Սարգսյանն ունի երկու որդի՝ Վարդան և Հայկ Սարգսյանները։ Հայտնի չէ, սակայն, թե ով է եղել դիմողը։ Forbes-ը նշում է, որ հարցում է ուղարկել Հայաստանի նախկին նախագահի մամուլի ծառայությանը։

Տաթև Ֆռանգյան