Երկրների տարածքային ամբողջականությունը պետք է հարգվի․ Վաշինգտոնի կոչը՝ Անկարային

Բոլոր երկրների ինքնիշխանությունն ու տարածքային ամբողջականությունը պետք է պաշտպանված լինեն։ Նման հայտարարություն է արել ԱՄՆ Պետքարտուղարության խոսնակ Նեդ Փրայսը՝ ի պատասխան թուրք լրագրողի հարցի, գրում է ekathimerini-ն։

Ճեպազրույցում թուրք լրագրողը հարցրել էր հետևյալը՝ «Հունաստանն ավելի ու ավելի է զինում Թուրքիայից մի քանի կիլոմետր հեռավորության վրա գտնվող կղզիները, որոնք սահմանափակված են որոշակի համաձայնագրերով: Ինչպիսի՞ն է ԱՄՆ-ի դիրքորոշումը այս թեմայի շուրջ, և դուք հավանությո՞ւն եք տալիս կղզիների այս ռազմականացմանը»:

Փրայսը պատասխանել է․ «Այս հարցում մեր դիրքորոշումը նույնն է, ինչ դուք լսել եք մի քանի շաբաթ առաջ, բոլոր երկրների ինքնիշխանությունն ու տարածքային ամբողջականությունը պետք է հարգվեն ու պաշտպանվեն։ Մենք շարունակում ենք խրախուսել ՆԱՏՕ-ի մեր դաշնակիցներին՝ Հունաստանին և Թուրքիային, որպեսզի միասին աշխատեն տարածաշրջանում խաղաղության և անվտանգության պահպանման և իրենց տարաձայնությունները դիվանագիտական ճանապարհով լուծեն։ Մենք կոչ ենք անում խուսափել հռետորաբանությունից, որը կարող է ավելի մեծացնել լարվածությունը: Հունաստանն ու Թուրքիան, իհարկե, երկուսն էլ ուժեղ գործընկերներ են, նրանք ՆԱՏՕ-ի առանցքային դաշնակիցներն են Միացյալ Նահանգների համար, և մենք կշարունակենք նրանց երկուսին էլ կոչ անել թուլացնել լարվածությունը»,-ասել է Փրայսը։

Հիշեցնենք, որ վերջին շրջանում Թուրքիան պարբերաբար սպառնալիքներ է հնչեցնում Հունաստանի հասցեին՝ զգուշացնելով չռազմականացնել Էգեյան ծովում գտնվող հունական կղզիները։

Էմմա Չոբանյան