Քաղաքականություն
16.06.2022 | 21:17Ինչպե՞ս է տեսնում խաղաղության հասնելու բանաձևը Հելսինկյան ասոցիացիայի նախագահ Նինա Կարապետյանցը։ Factor TV-ի հարցազրույցում հարց ուղղեցինք իրավապաշտպանին, որ «խաղաղություն» բառը և երևույթը հաճախ է հարվածներ ստանում տեղին-անտեղին, և եթե Նիկոլ Փաշինյանն է խոսում խաղաղությունից, ուրեմն նրա ընդդիմախոսների տրամաբանությունն այն է, որ անհրաժեշտ է հարվածել ո՛չ միայն Փաշինյանին, այլև բուն գաղափարին։ Ինչո՞ւ խաղաղություն երևույթին հարվածելու փոխարեն բանավեճը դրանց հասնելու կամուրջների և միջոցների շուրջ չէ։ Ինչպե՞ս է պետք առաջ շարժվել:
«Հարևանների հետ պետք է համերաշխ ապրել, հատկապես` սահմանակից հարևանների։ Կենցաղային մակարդակից սկսած՝ հարևանները չեն կարող հավերժ թշնամի մնալ, դա ձեր կյանքը դժոխքի է վերածում։ Դու պետք է լինես ինչ-որ տեղ խոսելու, բանակցությունների նախաձեռնողը։ Դու պիտի կարողանաս խաղաքարտերն օգտագործեl հօգուտ քեզ։ Ասում են` «ամեն ինչ շատ վատ է», բայց ժողովո՛ւրդ, միշտ է ամեն ինչ շատ վատ լինում, եկեք մտածենք՝ ի՞նչ է պետք անել, որ իրավիճակը մի քիչ թոթափվի, ավելի թեթևանա։ Պետք է խոսել, եթե անգամ դրա եզրերը շատ դժվար են գտնվում»,- ասաց Նինա Կարապետյանցը։
Քաղաքական ուժերը հաճախ խոսում են հարևանների հետ խաղաղությունից, բայց ներքին պառակտումն են խորացնում, թշնամանք հրահրում:
«Օրինակ` մեր իշխանությունները պարբերաբար թափահարում են իրենց «չագուչը»՝ անմեղսունակ հայտարարություններ անում։ Ընդդիմության մասին չեմ էլ ուզում խոսել, որովհետև նա պատվերով աշխատող ընդդիմություն է, գաղափար ու միտք չունեն գեներացնելու՝ հրահանգ կատարողներ են։ Ռուսաստանից պատվերով աշխատող բան է։ Չի կարող պատահել՝ գնան բոլոր դեսպանատների դիմաց, պահանջներ ներկայացնեն ԵՄ-ի և ԱՄՆ-ի դեսպաններին, բայց ՌԴ-ի թիվ 2-րդ պաշտոնյան եկավ Հայաստան, և դուք նրան հարց չտվեցիք՝ եկել-մտել են մեր տարածք, դու մեր ռազմավարական գործընկե՞րն ես, թե՞ չէ։ Դուք հարց չունե՞ք իրենց տալու։ Չունեն տալու հարց, որովհետև տերերին հարցեր չեն տալիս, տերերի հրահանգներն են կատարում»,- ասաց Հելսինկյան ասոցիացիայի նախագահ Նինա Կարապետյանցը։
Հարցազրույցն ամբողջությամբ՝ տեսանյութում։
Ռոբերտ Անանյան
