17.01.2026 | 14:10
Նոր համայնքային փնջեր են ձևավորվելու․ նախարարությունը նախագիծ է ներկայացրել
Մեդինսկին հայտարարել է, որ Ուկրաինայի հետ համաձայնագիրը 75%-ով համաձայնեցված է՝ Կիևին մեղադրելով նախագծին չպատասխանելու համար
Քաղաքականություն
16.06.2022 | 19:10
Դեռևս ապրիլին Ռուսաստանը և Ուկրաինան 75%-ով համաձայնության են եկել խաղաղության պայմանագրի նախագծի շուրջ, սակայն հետո բանակցությունները դադարեցվել են։ Այս մասին հայտարարել է բանակցություններում ՌԴ պատվիրակության ղեկավար Վլադիմիր Մեդինսկին։
«Այդ բանակցություններն ապրիլի 15-ին ավարտվել են նրանով, որ մենք ուկրաինական կողմին հանձնեցինք բանակցային խմբերի համաձայնեցրած համաձայնագրի նախագիծը։ Այն համաձայնեցված է եղել 75 տոկոսով։ Արդեն ավելի քան երկու ամիս է անցել, սակայն մինչ օրս ուկրաինական կողմը դրան պաշտոնապես չի պատասխանել՝ մեզ բանավոր փոխանցելով, որ մասնակցում է բանակցություններին»,- ասել է Մեդինսկին։
Նրա խոսքով՝ Մոսկվայի մոտ այնպիսի տպավորություն է ստեղծվում, որ Ուկրաինայի ղեկավարությանն այդքան էլ խաղաղություն պետք չէ։
«Ընդհատվել է այն բանից հետո, ինչ Ուկրաինա են այցելել ԱՄՆ Պետքարտուղարության և Պենտագոնի ղեկավարները։ Ես այսպես եմ հասկանում, որ խորհրդակցություններ են անցկացվել, ինչից հետո բանակցություններում ընդմիջում է վերցվել»,- հավելել է Մեդինսկին։
Նա պնդել է, որ Ռուսաստանը բաց է Ուկրաինայի հետ բանակցությունների համար, սակայն Կիևը մինչ օրս պաշտոնապես չի պատասխանել խաղաղության համաձայնագրի նախազծին։
Ավելի վաղ ԶԼՄ-ները հայտնել էին, որ ԱՄՆ-ը, Մեծ Բրիտանիան և Եվրամիությունը մի քանի շաբաթ է՝ բանակցում են Ուկրաինայի դեմ Ռուսաստանի պատերազմին վերջ տալու ծրագրի շուրջ։ Քննարկվում են նախագծի մոտավոր չափորոշիչները, որոնք կարող են առաջարկվել Ուկրաինային։
Տաթև Ֆռանգյան
