Ուկրաինային աջակցությունը կշարունակվի․ Շոլցը՝ Կիևում

Գերմանիայի կանցլեր Օլաֆ Շոլցը վստահեցրել է Ուկրաինային, որ Բեռլինը կշարունակի աջակցություն ցուցաբերել ռուսական ագրեսիայի դեմ պայքարում, փոխանցում է DW-ի ռուսական ծառայությունը։

«Մենք ցանկանում ենք ոչ միայն համերաշխություն դրսևորել, այլ նաև հավաստիացնել, որ մեր կազմակերպած օգնությունը կշարունակվի ֆինանսապես, մարդասիրական, նաև ռազմական առումով: Եվ մենք այն կշարունակենք այնքան ժամանակ, քանի դեռ դա անհրաժեշտ է Ուկրաինայի՝ հանուն անկախության համար պայքարի»,- ասել է Շոլցը հունիսի 16-ին Կիև մեկնելիս, ուր նա ժամանել է Ֆրանսիայի նախագահ Էմանուել Մակրոնի և Իտալիայի վարչապետ Մարիո Դրագիի հետ։

Միևնույն ժամանակ, շարունակել է կանցլերը, իրենք ևս մեկ անգամ կհստակեցնեն, որ Ռուսաստանի դեմ կիրառվող պատժամիջոցները չափազանց կարևոր են։ «Որովհետև դրանք նպաստում են, որպեսզի հավանականություն լինի, որ Ռուսաստանը հրաժարվի իր ծրագրից և դուրս բերի իր զորքերը, սա է նպատակը»։

Կանցլեր Շոլցը, նախագահ Մակրոնը և վարչապետ Դրագին հունիսի 16-ին ժամանել են Կիև։ Նրանք Ուկրաինայի մայրաքաղաք են եկել Լեհաստանից հատուկ գնացքով։ Նախապես երեք եվրոպացի առաջնորդների այցի մասին պաշտոնապես չէր հայտարարվել՝ անվտանգության նկատառումներից ելնելով։ Կիևում նրանք հանդիպել են Ուկրաինայի նախագահ Վլադիմիր Զելենսկու հետ։ Բանակցությունների հիմնական թեմաներն են եղել Ուկրաինային ռուսական ագրեսիան հետ մղելու հարցում հետագա աջակցությունը և ԵՄ-ին անդամակցելու՝ Ուկրաինայի ցանկությունը։

Տաթև Ֆռանգյան