«Ազոտ» քիմգործարանի բունկերում իրավիճակը դառնում է սպառնալից․ ՄԱԿ

Սևերոդոնեցկի «Ազոտ» քիմիական գործարանի տակ գտնվող բունկերում, որը արգելափակված է ռուսական զորքերի կողմից և որտեղ թաքնված են խաղաղ բնակիչներն ու ուկրաինացի զինվորականները, դառնում է սպառնալից, քանի որ սպառվում են առաջին անհրաժեշտության մթերքների և անգամ ջրի պաշարները։ Այս մասին BBC-ին հայտնել է ՄԱԿ-ի հումանիտար հարցերի համակարգման գրասենյակի ներկայացուցիչ Սավիանո Աբրեուն։

«Ջրի, հիգիենայի պարագաների բացակայությունը խիստ մտահոգիչ է։ Սա մեզ շատ է անհանգստացնում, քանի որ մարդիկ չեն կարող երկար ապրել առանց ջրի»,-ասել է նա՝ հավելելով, որ սննդամթերքն ու դեղորայքը ևս սպառվում են։

ՄԱԿ-ի մարդասիրական գրասենյակը պատրաստվում է օգնություն ցուցաբերել շրջափակման մեջ գտնվողներին, սակայն կազմակերպությունը խաղաղ բնակիչների անվտանգ մուտքի երաշխիքներ չունի:

«Եթե նրանք ստիպված լինեն օգտագործել ոչ մաքուր ջուր, ապա դա կհանգեցնի առողջության հետ խնդիրների։ Մենք պետք է, որքան հնարավոր է շուտ ապահովենք, որ  այնտեղ մնացածներն ունենան ջրի հասանելիություն»,-ասել է Աբրեուն։

Ռուսաստանը խոստացել է մարդասիրական միջանցք բացել «Ազոտից» խաղաղ բնակիչներին տարհանելու համար, սակայն այդ ուղղությամբ քայլեր դեռ չկան։

«Հակամարտության երկու կողմերն էլ ունեն միջազգային մարդասիրական իրավունքով պարտավորություններ՝ պաշտպանելու խաղաղ բնակիչներին, ուստի դա տարբերակ չէ։ Նրանք պետք է երաշխավորեն, որ քաղաքը լքել ցանկացողները դա  կարողանան անել անվտանգ»,-ասել է ՄԱԿ-ի պաշտոնյան։

Էմմա Չոբանյան