06.10.2026 | 00:38
Ազգերի լիգա. Հայաստանի հավաքականը ոչ-ոքի խաղաց Չեռնոգորիայի հետ
Վրաստանը 75 %-ով ավելացնում է բեռնատարների տարանցման վճարը․ ինչպես դա կազդի հայաստանցի արտահանողի վրա․ ՏԵՍԱՆՅՈւԹ
Քաղաքականություն
15.06.2022 | 19:32
Վրաստանի տարածքով բեռնատարներով ապրանք տեղափոխողները 5 օրից ստիպված կլինեն ավելի թանկ վճարել։ Տարանցիկ ճանապարհներից օգտվելու վճարը հունիսի 20-ից կբարձրանա 75 տոկոսով՝ 200 լարիից հասնելով 350-ի։ Վրաստանի կառավարությունը ավելի վաղ բարձրացրել էր նաև կայանատեղերի գինը։
Վերջին շրջանում ամեն ինչ է թանկացել, եթե միայն տարանցման վճարը լիներ, բացասական ազդեցությունն այնքան էլ մեծ չէր լինի՝ ասում է բեռնափոխադրող ընկերության տնօրենը։
Ավտոկայանատեղերի և տարանցման վճարների թանկացումը մեկ բեռնատարի համար կազմում է մոտավորապես 150 դոլար։ Մեր զրուցակցի բեռնափոխադրող ընկերությունը ամսական 30 մեքենա է ուղարկում Ռուսաստանի Դաշնություն, ստացվում է՝ ամսական ծախսն ավելանում է 4500 դոլարով։ Ըստ ընկերության տնօրենի՝ թեպետ այս գումարը պետք է պատվիրատուն վճարի, սակայն չեն ցանկանում վճարել։ Ասում է՝ եթե անգամ գումարի կեսն էլ փոխհատուցեն, իրենք գոհ կլինեն։
2022 թվականի առաջին եռամսյակում Վրաստանի տարածքով տեղափոխված ապրանքների տարանցման համար գանձված գումարը կազմել է 23,2 միլիոն լարի։ Ըստ մասնագետների կանխատեսումների՝ 2023 թվականին Վրաստանով կանցնի առնվազն 355 հազար բեռնատար, իսկ ընդհանուր եկամուտը կգերազանցի 130 միլիոն լարին։ Իսկ թե ավելացված տուրքերի պարագայում հայկական տնտեսվարողների ընդհանուր վնասը որքան կկազմի, այս հարցի պատասխանն առայժմ չկա։
Մանրամասները՝ տեսանյութում։
Սաթենիկ Հայրապետյան
