28.06.2026 | 18:55
Վթարված մեքենայում հայտնաբերվել է նախկին նախարար Գագիկ Ստամբուլցյանի մարմինը
«Նախկինից ժառանգած խնդիր է»․ պատգամավորը ուշադրություն հրավիրեց հաշմանդամ օդաչուների խնդրին․ ՏԵՍԱՆՅՈՒԹ
Հասարակություն
15.06.2022 | 17:08
Արդեն լուծարված «Հայկական ավիաուղիներ» կազմակերպության՝ հաշմանդամ օդաչուների իրավունքները 15 տարի է՝ ոտնահարված են, կառավարության հետ հարցուպատասխանի ժամանակ ասաց ԱԺ պատգամավոր Զարուհի Բաթոյանը։
«Բանն այն է, որ 2004 թվականին կառավարությունն ուժը կորցրած է ճանաչել մի որոշում, որով կազմակերպության լուծարման դեպքում վնասը փոխհատուցում են նրա իրավահաջորդը կամ պետական բյուջեն։ Բայց ներպետական օրենսդրությամբ բացակայում են իրավական կառուցակարգերը, որոնք ուղղված են կազմակերպության լուծարման դեպքում աշխատավայրում դժբախտ դեպքերի հետևանքով հատուցում ստանալուն։ Արդյունքում օդաչուները զրկվել են վնասի հատուցման ամենամսյա վճարներից»,- նշեց Բաթոյանը:
ՀՀ արդարադատության նախարար Կարեն Անդրեասյանը հավաստիացրեց, որ իրենք զբաղվում են վերոնշյալ խնդրով և այժմ էլ սերտորեն համագործակցում են Աշխատանքի և սոցիալական հարցերի նախարարության հետ։
«Օդաչուներին էլ ենք հայտնել, որ գործընթացի մեջ ենք, ընդ որում՝ իրենց շահերից ելնող որոշակի քայլեր արդեն արվել են կառավարության կողմից։ Քայլեր են արվում այդ մարդկանց իրավունքների պաշտպանության համար»,- նշեց նախարարը։
Զարուհի Բաթոյանն արձագանքեց՝ նշելով, որ հաշմանդամություն ունեցող օդաչուներից շատերը տարեց են, և գործընթացն արագացնելու անհրաժեշտություն կա՝ ինչ-որ չափով մեղմելու վերջիններիս սոցիալական վիճակը։
«Նախկինից ժառանգած խնդիր է, որի լուծումը մեր կառավարությունը կփորձի հնարավորինս շուտ տալ»,- նշեց արդարադատության նախարարը:
Մանրամասները՝ տեսանյութում:
