08.06.2026 | 13:41
Էստոնիայի վարչապետը շնորհավորել է Փաշինյանին ԱԺ ընտրություններում ՔՊ-ի հաղթանակի առիթով
էլեկտրաէներգիայի ու գազի սակագինը հնարավո՞ր է իջնի դրամի արժևորմամբ պայմանավորված․ Թունյան․ ՏԵՍԱՆՅՈՒԹ
Տնտեսություն
15.06.2022 | 16:59
«Քաղաքացիական պայմանագիր» խմբակցության պատգամավոր Բաբկեն Թունյանը, ԱԺ-կառավարություն հարց ու պատասխանի ժամանակ անդրադառնալով դրամի արժևորմանը, նշեց, որ նախորդ տարվա համեմատ դրամը դոլարի նկատմամբ արժևորվել է 20 տոկոսով և հետաքրքրվեց. «Եթե փոխարժեքը կայունանա հենց այս միջակայքում, հնարավո՞ր է, որ էլեկտրաէներգիայի ու գազի սակագների վերանայման և իջեցման հնարավորություն լինի, որովհետև իրենց հաշվարկների մեջ հենց մեծ դեր ունի փոխարժեքը»:
Պատգամավորի դիտարկմամբ՝ նախկինում, երբ դրամն արժեզրկվել է, այդ ընկերությունները սովորաբար դիմել են Հանրային ծառայությունները կարգավորող հանձնաժողով՝ սակագները դեպի վերև վերանայման հայտով։
Ի պատասխան՝ փոխվարչապետ Մհեր Գրիգորյանը նշեց, որ սակագներում փոխարժեքի ազդեցությունը հաշվարկված է, և դրամի արժևորվումը, բնականաբար, հաշվարկների մեջ պետք է մասնակից լինի։
«Այլ հարց է, թե ինչքանով է այս իրավիճակը ֆունդամենտալ, երկարատև։ Իրոք, չի բացառվում, որ սա երկարատև միտում է այլևս, և նույնիսկ բյուջեով նախատեսված փոխարժեքի կամ սակագնային գործառույթներում որոշված կամ հիմք ընդունված փոխարժեքի համեմատությամբ, այո, սա արժևորված փոխարժեք է։ Եթե այլ բաղադրիչներով հավելյալ ճնշումներ չլինեն, վստահ եմ, որ Հանրային ծառայությունները կարգավորող հանձնաժողովը տարվա կտրվածքով այս հարցին կանդրադառնա»,- նշեց Գրիգորյանը։
Մանրամասները՝ տեսանյութում:
