Հունաստանի վարչապետն «անհեթեթ» է որակել Էգեյան ծովում հունական կղզիների ինքնիշխանության հետ կապված Թուրքիայի դիրքորոշումը

Հունաստանի վարչապետ Կիրիակոս Միցոտակիսը հայտարարել է, որ Թուրքիայի դիրքորոշումը, որը կասկածի տակ է դնում Հունաստանի ինքնիշխանությունը Էգեյան ծովում իր կղզիների նկատմամբ, «անհեթեթ է», որը դժվարացնում է երկու երկրների միջև ցանկացած բանակցություն։ Այս մասին գրում է Reuters-ը, որին վկայակոչում է Duvar-ը։

«Թուրքիայի առարկությունները, ինչպես դրանք արտահայտվել են ՄԱԿ-ին ուղղված վերջին նամակներում, բացարձակ անհեթեթ են, քանի որ դրանք հարցեր են առաջացնում իր կղզիների նկատմամբ Հունաստանի ինքնիշխանության վերաբերյալ: Մենք չենք կարող այդ աբսուրդի շուրջ որևէ քննարկում ունենալ»,- ասել է Միցոտակիսը ERT պետական հեռատեսությանը տված հարցազրույցում։

Հավելենք, որ վերջին շրջանում Թուրքիայի և Հունաստանի միջև լարվածությունը կտրուկ աճել է։ Անկարան պահանջում է, որ Աթենքը դադարեցնի հունական կղզիների ռազմականացումը։ Թուրքիայի նախագահ Ռեջեփ Թայիփ Էրդողանը նաև հայտարարել է, որ իր համար Միցոտակիսն այլևս գոյություն չունի և նրան մեղադրել ԱՄՆ կատարած այցի ժամանակ Թուրքիային F-16 կործանիչների վաճառքն արգելափակելու փորձի մեջ։

Միցոտակիսն էլ ասել է, որ երկու առաջնորդներն ինչ-որ պահի անխուսափելիորեն հանդիպելու են, և չպետք է դադարեն խոսել միմյանց հետ:

«Մենք պետք է հանդիպենք և պետք է քննարկենք… Մենք պետք է կարողանանք համաձայնել, որ տարաձայնություններ կան, սակայն մենք կարիք ունենք համաձայնեցնելու շրջանակներ՝ տարաձայնությունները լուծելու համար»,- ասել է Հունաստանի վարչապետը։

Էմմա Չոբանյան