17.01.2026 | 14:14
Հրդեհ Տիչինայի փողոցում
Արևմուտքը պետք է ավելի շատ ծանր սպառազինություն ուղարկի Ուկրաինային․ Ստոլտենբերգ
Քաղաքականություն
15.06.2022 | 14:19
Արևմտյան երկրները պետք է Ուկրաինային ավելի շատ ծանր սպառազինություն ուղարկեն, որպեսզի օգնեն զսպել ՌԴ-ի զորքերի հարձակումը երկրի արևելքում։ Այս մասին հայտարարել է ՆԱՏՕ-ի գլխավոր քարտուղար Յենս Ստոլտենբերգը Հաագայում Նիդեռլանդների, Դանիայի, Լեհաստանի, Ռումինիայի, Լատվիայի, Պորտուգալիայի և Բելգիայի ղեկավարների հետ հանդիպումից հետո կայացած մամուլի ասուլիսում, գրում է DW ռուսական ծառայությունը։
Ըստ նրա՝ Ուկրաինան լիովին կախված է արևմտյան ռազմական օգնությունից՝ դիմակայելու ռուսական ներխուժմանը։
ՆԱՏՕ-ի գլխավոր քարտուղարն ընդգծել է, որ դաշինքն արդեն որոշակի քայլեր է ձեռնարկել Կիևին ծանր սպառազինության մատակարարումն ավելացնելու ուղղությամբ։ ՆԱՏՕ-ի երկրների ղեկավարներն այս ուղղությամբ հետագա անելիքները կքննարկեն հունիսի 15-ին Բրյուսելում։
Լեհաստանի վարչապետ Մատեուշ Մորավեցկին էլ, ելույթ ունենալով նույն հանդիպմանը, ասել է, որ Արևմուտքը «բավական ջանքեր չի գործադրում» Ուկրաինային աջակցելու համար։ Ուստի նա կոչ է արել ավելի շատ զենք ուղարկել Կիևին, այդ թվում՝ հրետանի։
«Մենք չենք ունենա արդարացում, եթե թույլ տանք Ռուսաստանին հաղթել։ Դա կլինի լիակատար ձախողում և աղետ Եվրամիության, մեր արժեքների և ՆԱՏՕ-ի համար»,- ասել է Մորավեցկին։
Էմմա Չոբանյան
