07.08.2026 | 23:37
Անձրև, ամպրոպ և ջերմաստիճանի նվազում. առաջիկա օրերի եղանակի կանխատեսումը
2020-ին քովիդի պետական ծախսերի արդյունավետության մասով քրգործ է հարուցվել
Հասարակություն
14.06.2022 | 17:10
Հակակոռուպցիոն կոմիտեում քրեական գործ է հարուցվել կորոնավիրուսի դեմ պայքարի շրջանակում կատարված ծախսերի հետ կապված: Factor.am-ին այս մասին տեղեկացրեց Հակակոռուպցիոն կոմիտեի մամուլի խոսնակ Մարինա Օհանջանյանը։
«Քրեական գործը հարուցվել է մայիսի վերջին Դատախազությունից ուղարկած նյութերի հիման վրա»,- ասաց Օհանջանյանը։
Քրեական գործը հարուցվել է մի շարք հոդվածներով՝ յուրացում, պաշտոնեական լիազորությունների չարաշահում, պաշտոնեական կեղծիք։ Ըստ խոսնակի՝ նախաքննությունը շարունակվում է, մեղադրյալի կարգավիճակ ունեցող անձինք դեռևս չկան։
Գործ հարուցելու հիմք է ծառայել անցյալ ամիս Հաշվեքննիչ պալատի հրապարակած բյուջետային ծախսերի իրականացման վերաբերյալ հաշվեքննության եզրակացությունը, ըստ որի, կորոնավիրուսի տարածումը կանխելուն և բուժմանն ուղղված միջոցները նպատակային և արդյունավետ չեն օգտագործվել, բացահայտվել են մի շարք խախտումներ: Հաշվեքննությունը վերաբերում է 2020 թվականի 12 ամիսներին, երբ առողջապահական գերատեսչությունը ղեկավարում էր Արսեն Թորոսյանը։
Հիշեցնենք՝ հունիսի 10-ին այս թեմայի շուրջ Ազգային ժողովում բավականին թեժ քննարկում էր ծավալվել «Քաղաքացիական պայմանագիր» խմբակցության պատգամավորների և Հաշվեքննիչ պալատի նախագահ Ատոմ Ջանջուղազյանի միջև։
Արփի Հակոբյան
