Թուրքիայի ԶՈՒ-ն մարտական դիրք է զբաղեցրել Սիրիայում քրդերի դեմ գործողության մեկնարկի համար․ ԶԼՄ-ներ

Թուրքիայի ԶՈՒ-ն մարտական ​​դիրք է գրավել՝ երկրում արգելված Քուրդիստանի աշխատավորական կուսակցության (PKK) զինյալների դեմ Սիրիայի հյուսիսում գործողություն իրականացնելու համար։ Այս մասին գրում է  թուրքական Sabah թերթը, որին վկայակոչում է ՌԻԱ Նովոստին։

Ավելի վաղ Թուրքիայի նախագահ Ռեջեփ Թայիփ Էրդողանը հայտարարել էր, որ նոր գործողություն են իրականացնելու Սիրիայում՝ 30 կմ-անոց «անվտանգության գոտի» ստեղծելու նպատակով։ Լրատվամիջոցների տվյալներով՝ գործողությունն իրականացվելու է Սիրիայի չորս շրջաններում։

«Հրատապ լուրեր, Թուրքիայի ԶՈՒ-ն և Սիրիայի ազգային բանակը մարտական ​​դիրք են գրավել Սիրիայի հյուսիսում՝ PKK/YPG-ի ահաբեկիչների թիրախների դեմ գործողության համար: Մեծ ակտիվություն կա նաև Մանբիջի և Թել Ռիֆաթի քաղաքային կենտրոններում»,- դեպքի վայրից հաղորդել է լրատվամիջոցի թղթակիցը։

Նշվում է, որ քրդական միավորումները քաղաքում անցակետեր են տեղադրել, բացի այդ, զենք ու զինյալներ են տեղափոխում՝ թուրքերին դիմակայելու համար։

Լրատվամիջոցը նաև գրում է, որ ԱՄՆ զինվորականները YPG/PKK-ի զինյալների հետ համատեղ պարեկություն են իրականացրել։

Հավելենք, որ նախօրեին էլ թուրքական Hurriyet-ը գրել էր, որ Սիրիայում Թուրքիայի նոր ռազմական գործողությունը կարող է սկսվել Իրաքի հյուսիսում թուրքական բանակի անդրսահմանային գործողության ավարտից հետո։ Լրատվամիջոցը չէր բացառել, որ գործողության մեկնարկի հրամանը կարող է տրվել մահմեդական գլխավոր տոնից՝ Կուրբան Բայրամից անմիջապես հետո, որն այս տարի նշվում է հուլիսի 9-12-ը։

Էմմա Չոբանյան