Թուրքիայի ԶՈւ-ն Սիրիայում նոր ռազմական գործողությունը կարող է սկսել Կուրբան Բայրամից անմիջապես հետո․ ԶԼՄ-ներ

Սիրիայում Թուրքիայի նոր ռազմական գործողությունը կարող է սկսվել Իրաքի հյուսիսում թուրքական բանակի ներկայիս անդրսահմանային գործողության ավարտից հետո։ Այս մասին հայտնում է թուրքական Hürriyet-ը, որին վկայակոչում է ՏԱՍՍ-ը։

Լրատվամիջոցը չի բացառում, որ գործողության մեկնարկի հրամանը կարող է տրվել մահմեդական գլխավոր տոնից՝ Կուրբան Բայրամից անմիջապես հետո, որն այս տարի նշվում է հուլիսի 9-12-ը։

Ապրիլի 18-ից թուրքական բանակը Իրաքի հյուսիսում գործողություն է իրականացնում։ Ներկայում, Թուրքիայի ՊՆ տվյալներով, ոչնչացվել են Թուրքիայում արգելված Քուրդիստանի աշխատավորական կուսակցության (PKK) ավելի քան 220 զինյալներ, նրանց հիմնական հենակետերը, զենքի ու պարենի պահեստները։

Hürriyet-ի տվյալներով՝ Թուրքիայի ԶՈւ-ն ցանկանում է հաջողությամբ ավարտել գործողությունը Իրաքում, ուստի սիրիական նոր գործողության մեկնարկը պետք է հաշվարկել Իրաքում ռազմական գործողությունների դադարեցման պահից։ Մյուս կողմից, ըստ լրատվականի, վերջնական չի ավարտվել բանակային խմբավորման ձևավորումը Թել Ռիֆաթում ու Մանբիջում գործողության իրականացման համար։

Hürriyet-ը նաև հիշեցնում է Թուրքիայի նախագահ Ռեջեփ Թայիփ Էրդողանի խոսքերն այն մասին, որ Սիրիայում գործողությունը կարող է մեկնարկել ցանկացած պահի։

«Թուրքիայի ԶՈւ-ն չի սկսի գործողությունը, եթե դրան լիարժեք պատրաստ չլինի։ Պետք է ուշադրություն դարձնել Կուրբան Բայրամ տոնին, որից հետո գործողությունը կարող է սկսվել ոչ թե մի քանի օրվա ընթացքում, այլ հաշված ժամերի ընթացքում»,- գրում է թուրքական իշխանությունների հետ սերտ կապերով հայտնի Hürriyet-ի սյունակագիր Աբդուլքադըր Աքսուն։

Հիշեցնենք՝ որ ավելի վաղ Էրդողանն ազդարարել էր, որ Անկարան նոր ռազմական գործողություն է սկսելու Սիրիայում Թուրքիայի հետ սահմանին «30 կմ-անոց անվտանգության գոտի» ստեղծելու նպատակով։

Էմմա Չոբանյան