19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
Ինձ հայհոյել էին, ոստիկանությունից զանգեցին, բայց հրաժարվեցի բողոքել. Վիգեն Խաչատրյան․ ՏԵՍԱՆՅՈՒԹ
Քաղաքականություն
13.06.2022 | 12:56
«Թե ինչու որոշվեց ապաքրեականացնել ծանր վիրավորանքը, մանրամասներին տեղյակ չեմ»,- այս մասին խորհրդարանում լրագրողների հետ ճեպազրույցում նշեց «Քաղաքացիական պայմանագիր» խմբակցության պատգամավոր, պետաիրավական հարցերի հանձնաժողովի անդամ Վիգեն Խաչատրյանը։
Անդրադառնալով դիտարկմանը, որ իշխանությունը որոշել է ապաքրեականացնել ծանր վիրավորանքը՝ հաշվի առնելով նաև հազարի հասնող գործերի թիվը, պատգամավորը նշեց. «Ինչ վերաբերում է հազարավոր գործերին, ապա դա անհեթեթություն է։ Ես չեմ կարծում, որ ՀՀ-ում այդքան անդաստիարակ մարդ կա, որ իրեն թույլ կտա այդքան… Բոլոր դեպքերում տեղյակ չեմ մանրամասներին»:
«Իմ կարծիքով՝ կարելի էր օրենքը թողնել այնպես, ինչպես որ կա, կարելի է և փոխել, բայց դա այն խնդիրն է, որն օրենքով չի լուծվում, դա կախված է մարդկանց դաստիարակությունից, ավանդույթներից: Եթե խոսքը վերաբերում է հայհոյանքին, որևէ իրեն հարգող մարդ իրեն չպետք է թույլ տա հայհոյել: Օրենքով այդ հարցը չի կարգավորվի, մենք պետք է մտածենք ընդհանուր մթնոլորտի, վարք ու բարքի, հարաբերությունների մասին»,- նշեց պատգամավորը՝ հավելելով, որ առկա է կրթական համակարգի լուրջ խնդիր, պետք է լուրջ տեղ հատկացնել կրթական համակարգի դաստիարակչական մասին, քանի որ այսօր ականատես ենք զոռբայության ու անդաստիարակության դրսևորումների՝ ԱԺ դահլիճից մինչև տրանսպորտ»,- նշեց պատգամավորը:
Խաչատրյանը հավելեց նաև, որ իրեն ևս հայհոյել էին, բայց ոստիկանությունից երբ զանգել էին, հրաժարվել է բողոքել: «Ինձ հայհոյել էին սոցիալական ցանցում, ոստիկանությունից զանգեցին, երկու անգամ հրաժարվել եմ բողոքելուց: Գիտեմ՝ ով է հայհոյողը, զանգեցի եղբորը, ասացի՝ երևի դուք զբաղվեք նրա դաստիարակությամբ»:
Հիշեցնենք՝ ՀՀ արդարադատության նախարար Կարեն Անդրեասյանը Facebook-ի էջում տեղեկացրել է, որ վարչապետի գլխավորությամբ կայացած միջգերատեսչական քննարկումների արդյունքներով նպատակահարմար չի համարվել ծանր վիրավորանքի ամրագրումը նոր Քրեական օրենսգրքում. այդ անընդունելի երևույթի համար կպահպանվի միայն քաղաքացիական պատասխանատվությունը` մինչև 3.000.000 դրամի չափով։ Հուլիսի 1-ից ուժի մեջ մտնող Քրեական օրենսգիրքը այլևս պատասխանատվություն չի նախատեսում ծանր վիրավորանքի համար:
Մանրամասները՝ տեսանյութում:
