28.06.2026 | 16:37
Բագրատաշենի մաքսային կետում մաքսային ձևակերպումներն իրականացվել են անխափան և բնականոն ընթացքով. ՊԵԿ
ՄԻԵԴ-ը հերթական անգամ տուգանել է Ադրբեջանի կառավարությանը
Քաղաքականություն
10.06.2022 | 16:04
Մարդու իրավունքների եվրոպական դատարանը (ՄԻԵԴ) չորս գործով վճիռ է կայացրել Ադրբեջանի կառավարության դեմ և տուգանել երկրի իշխանություններին ընդհանուր 22․500 եվրոյի չափով, գրում են ադրբեջանական լրատվամիջոցները։
Ադրբեջանի քաղաքացիները դիմել են Եվրոպական դատարան՝ սեփականության իրավունքի, ազատության և անձեռնմխելիության իրավունքների, արդար դատավարության և խոշտանգումների խախտման վերաբերյալ բողոքներով։
Նախօրեին դատարանը քննել և վճիռ է կայացրել Ադրբեջանի քաղաքացիների բողոքների հիման վրա չորս գործով։ Ադիլ Դադաշևի և Թուրալ Հաջիբեյլիի («Մուսավաթ» կուսակցության անդամ) գործով ՄԻԵԴ-ը հայտնաբերել է Եվրոպական կոնվենցիայի 5.1 (ազատության և անձի անվտանգության իրավունք) և 6.1 (արդար դատաքննության իրավունք) կետերի խախտում։ ՄԻԵԴ-ը պարտավորեցրել է յուրաքանչյուրին 4․000 եվրո վճարել։
«Ալիևներն ընդդեմ Ադրբեջանի» գործով ՄԻԵԴ-ը բավարարել է Նախիջևանում սեփական բնակարանից վտարված հինգ հոգանոց ընտանիքի բողոքը։ Դատարանը պարտավորեցրել է Ադրբեջանին նրանց 7․094 եվրո վճարել։ «Ջումշուդ Բայրամովն ընդդեմ Ադրբեջանի գործով» դատարանը պարտավորեցրել է վճարել 3․500 եվրո։
«Մուսավաթ» կուսակցության ակտիվիստ Ալիքրամ Խուրշիդովի նմանատիպ բողոքը բացառվել է ՄԻԵԴ գործերից՝ հաշվի առնելով Ադրբեջանի կառավարության պատրաստակամությունը՝ 3․500 եվրո վճարել դիմումատուին։
Էմմա Չոբանյան
