Ընդդիմությունը կաշկանդվա՞ծ էր Լավրովի այցով. զուսպ ակցիա՝ առանց ԱԳՆ շենք մտնելու պլանների․ ՏԵՍԱՆՅՈւԹ

Նիկոլ Փաշինյանի հրաժարականը պահանջող ընդդիմադիրներն այսօր վաղ առավոտից էին հավաքվել Ֆրանսիայի հրապարակում։ Նրանք երթ անցկացրեցին՝  Հայաստանի ԱԳՆ շենք հասնելու նպատակով: Այնտեղ հայաստանցի պաշտոնակցի հետ հանդիպում էր ՌԴ ԱԳ նախարար Սերգեյ Լավրովը: Ընդդիմադիրների երթը, սակայն, կանգ առավ Գլխավոր դատախազության շենքի դիմաց:

Ընդդիմությունը, որը մայիսի 24-ի ակցիայի ժամանակ ոստիկանական պատնեշները հաղթահարելով՝ մուտք էր գործել գերատեսչության շենք, այսօր ո՛չ փորձ արեց շրջափակել նախարարության շենքը, ո՛չ էլ մուտք գործել գերատեսչություն։ Ռոբերտ Քոչարյանի և Սերժ Սարգսյանի թիմակիցները հայտարարեցին, որ այսօր ԱԳՆ շենքի տարածք չեն եկել Լավրովի հետ հանդիպման պլաններով:

Փաշինյանի հրաժարականը պահանջող խորհրդարանական ընդդիմությունը երբեք չի թաքցրել ռուսամետ դիրքորոշումը՝ մշտապես կարևորելով Ռուսաստանի հետ հարաբերությունների խորացումը: Ռոբերտ Քոչարյանն էլ իր ասուլիսներից մեկում պատասխանելով Factor TV-ի հարցին՝ հայտարարել էր, թե ՌԴ-ի հետ Միութենական պետության կազմ մտնելու հավանականությունն իր համար քննարկման ենթակա է:

«Հայաստան» դաշինքի ներկայացուցիչների ելույթների հիմնական շեշտադրումն այն էր, որ Նիկոլ Փաշինյանը չունի լեգիտիմություն, որով կարող է արտաքին գործընկերներին Ղարաբաղյան կարգավորման հարցում խոստումներ տալ և նոր զիջումների գնալ: Իսկ ահա ընդդիմության ՀՀԿ-ական թևից նշեցին, որ դժգոհություն կամ բողոք չունեն Լավրովին հղելու․ ինչպես «Պատիվ ունեմ» խմբակցության քարտուղար Հայկ Մամիջանյանն իր ելույթում ձևակերպեց՝ միայն դաշնակցային պահանջներ են:

Դիմելով Լավրովին՝ Հայկ Մամիջանյանը նաև հիշեցրեց, որ Պուտինը չի կատարել հայ գերիներին Ադրբեջանից Հայաստան վերադարձնելու պարտավորությունը, ինչը ստանձնել է 2020 թվականի նոյեմբերի 9-ի հայտարարությունը ստորագրելով: Ընդդիմադիր պատգամավորը Լավրովին ուղղված իր ելույթը եզրափակեց՝ ուշադրություն հրավիրելով Արցախի կարգավիճակի հայանպաստ լուծման վրա:

Այս համատեքստում, սակայն, ընդդիմադիրներն այսօր չդատապարտեցին Պուտինի՝ 44-օրյա պատերազմից մեկ ամիս անց հնչեցրած այն պնդումը, թե Արցախն Ադրբեջանի տարածք է:

Խորհրդարանական ընդդիմությունը Լավրովի այցի կապակցությամբ կազմակերպված ակցիայի շրջանակում զերծ մնաց Մոսկվային քննադատել այլ առանցքային հարցերում ևս: Մասնավորապես, ինչպե՞ս է ստացվում, որ անվտանգության երաշխավոր համարվող ռուս խաղաղապահի ներկայությամբ սպանվում են Արցախի խաղաղ բնակիչները և խախտվում է հրադադարի ռեժիմը: Անդրադարձ չկատարվեց ու չդատապարտվեց Մոսկվայում այս տարվա փետրվարին Պուտինի և Ալիևի մասնակցությամբ ստորագրված ռուս-ադրբեջանական ռազմավարական փոխգործակցության հռչակագրին, որի շրջանակում Ռուսաստանն ու Ադրբեջանը միմյանց օգնելու են նաև պատերազմների ժամանակ:

ԱԳՆ-ի մոտակայքում ընդդիմադիրների ակցիան տևեց շուրջ մեկ ժամ: Ուշագրավ է, որ Լավրովի այցի նպատակով իրականացվող ակցիային չէր մասնակցում ԱԱԾ նախկին տնօրեն, «Պատիվ ունեմ» խմբակցության ղեկավար Արթուր Վանեցյանը: Թիմակիցները նրա բացակայության հետ կապված հստակ տեղեկություններ չունեին:

ԱԳՆ-ի մոտ ընդդիմադիրների ակցիան տևեց շուրջ մեկ ժամ: Նրանք տարածքից հեռացան՝ հայտարարելով, թե իրենց ուղերձները հասել են Լավրովին:

Մանրամասները՝ տեսանյութում։

Նարեկ Կիրակոսյան