Քաղաքականություն
09.06.2022 | 19:10
Ադրբեջանի ԱԳՆ-ն արձագանքել է ՌԴ ԱԳ նախարար Սերգեյ Լավրովի Արցախի Փառուխի գյուղի վերաբերյալ արված հայտարարություններին։ Մասնավորապես, Ադրբեջանի ԱԳՆ մամուլի ծառայության ղեկավար Լեյլա Աբդուլլաևան հայտարարել է, որ Հայաստանի ու Ադրբեջանի միջև ստեղծված դելիմիտացիայի հանձնաժողովն ուղղված է երկու երկրների միջև պետական սահմանի որոշմանը։
«Դելիմիտացիայի գործընթացը չի նախատեսում որևէ հարցի քննարկում, որը դուրս է գալիս հայ-ադրբեջանական պետական սահմանից, ներառյալ՝ Ադրբեջանի «տարածքի հետ կապված հարցեր», որտեղ ժամանակավորապես տեղակայված է ռուսական խաղաղապահ զորախումբը»,-ասել է Աբդուլլաևան։
Այսօր ՀՀ ԱԳ նախարար Արարատ Միրզոյանի հետ մամուլի ասուլիում Լավրովը, խոսելով Արցախի Փառուխ գյուղում իրավիճակի մասին ասել էր, որ հարցը ռուս զինվորականների համար շարունակվում է դիտարկվել որպես առաջնահերթություն։
«Այս իրավիճակի կապակցությամբ կա լարվածության որոշակի թուլացում։ Կարծում ենք, որ սահմանազատման առարկայական աշխատանքներ սկսելու շրջանակում այդ հարցերն անպայման կքննարկվեն և լուծում կստանան»,- ասել էր Լավրովը։
Հիշեցնենք՝ Ադրբեջանի ԶՈՒ-ը, խախտելով նոյեմբերի 9-ի հրադադարի եռակողմ հայտարարությունը, ներխուժել էր Արցախի Փառուխ գյուղ, ինչպես նաև Քարագլխի բարձունքում դիրքեր զբաղեցրել։ Գյուղից ադրբեջանցիները հեռացել են, սակայն բնակիչները չեն կարողանում վերադառնել, քանի որ ադրբեջանական ուժերը շարունակում են մնալ Քարագլխի մի մասում։
Էմմա Չոբանյան
