12.10.2026 | 20:44
Նախագահ Վահագն Խաչատուրյանը օրենք է ստորագրել
Վաղը հայտարարում եմ ոչ աշխատանքային օր, ժամը 11-ից հավաքվում ենք Հանրապետության հրապարակում՝ հայ ժողովրդի դարակազմիկ հաղթանակը տոնելու. Նիկոլ Փաշինյան. ՏԵՍԱՆՅՈՒԹ
Քաղաքականություն
07.05.2018 | 22:44
Սիրելի՛ ժողովուրդ, Հայաստանի Հանրապետության հպարտ քաղաքացիներ. Հանրապետության հրապարակի հարթակից իր խոսքը սկսեց ՀՀ վարչապետի թեկնածու Նիկոլ Փաշինյանը, ապա հիշեցրեց, թե ինչպես Գյումրի ուղևորվելիս Արսինե Խանջյանը խիստ հուզված ժողովրդի ընդունելությունից, Ատոմ Էգոյանին և Սերժ Թանկյանին շարունակ գրում էր, թե շատ ափսոս, որ այստեղ չեք ու չեք տեսնում, թե ինչ է կատարվում: «Ու այսօր «Զվարթնոց» օդանավակայանից այստեղ ուղևորվելիս նույն բանը կատարվեց և Սերժ Սարգսյանը…,- Թանկյան ասելու փոխարեն Սարգսյան ազգանունն արտաբերեց Փաշինյանը, իսկ Սերժ Թանկյանը մոտենալով բարձրախոսին դիմեց ժողովրդին՝ «ինձ հանկարծ չմերժեք, հաճիս»: Նիկոլ Փաշինյանն էլ պատասխանեց,- Սերժ ջան վերջին 15 տարին ինձ մոտ ավտոմատ ռեժիմ ա, որ ասում եմ Սերժ, հետևից ավտոմատ գալիս ա Սարգսյան, կներեք: Եվ Թանկյանը սեփական աչքերով տեսավ այն, ինչ Արսինե Խանջյանը,- իր ասելիքն ավարտեց Փաշինյանը»:
Ապա խոսելով վաղը կայանալիք վարչապետի ընտրություններից, ասաց. «Ժողովուրդ ջան, արդեն լրացել է վրաչապետի թեկնածու առաջադրելու ժամկետը և այս պահի դրությամբ առաջադրված է մեկ թեկնածու և այդ թեկնածուին դուք եք առաջադրել: Վաղը՝ ժամը 12:00-ին, ԱԺ-ում սկսվելու է վարչապետի ընտրությունը ու խնդրում եմ ժողովուրդ, ժամը 11-ից հավաքվեք Հանրապետության հրապարակում: Արդեն իսկ պաշտոնական հավաստիացում եմ ստացել, որ ժողովրդի թեկնածուի օգտին քվեարկելու են ՀՅԴ-ն, «Ելքը», «Ծառուկյան» դաշինքը և ՀՀԿ-ից մի շարք պատգամավորներ, այսինքն՝ ունենք 95 տոկոս հավանականություն, որ վաղը ձեր առաջադրած թեկնածուն կընտրվի Հայաստանի Հանրապետության վարչապետ»:
Նիկոլ Փաշինյանն ասաց, որ իրեն շատ են դիմում հարցով, թե վաղը դասադուլ, գործադուլ չեն անում. «Ո՛չ ժողովուրդ ջան, դասադուլ ու գործադուլ չենք անում, ես վաղը հայտարարում եմ ոչ աշխատանքային օր: Եվ ուրեմն սա Հայաստանի քաղաքացու հաղթանակի ժամն է, սա հայ ժողովրդի հաղթանակի ժամն է, սա հայ ժողովրդի ազգային միասնության ժամն է, սա Արցախի Հանրապետության, Հայաստանի Հանրապետության աստեղային ժամն է, և վաղը հավաքվում ենք ժամը 11-ից Հանրապետության հրապարակում հայ ժողովրդի դարակազմիկ հաղթանակը տոնելու ու նշելու: Եվ ուրեմն՝ կեցցե Հայաստանի Հանրապետությունը, կեցցեն մեր երեխաներն ու մենք, որ ապրում ենք ազատ և երջանիկ Հայաստանում»:
Փաշինյանն ասաց, որ ճանապարհին Սերժ Թանկյանին համոզում էր, գալ և մշտական բնակություն հաստատել Հայաստոնում և նա խոստացել է մտածել այդ մասին:
