16.09.2026 | 19:37
Եվրոպա լիգա․ «Արարատ-Արմենիայի» մեկնարկային կազմը «Սպարտա Պրահայի» դեմ խաղում
ՌԴ-ն և Թուրքիան նախնական համաձայնություն են ձեռք բերել Սև ծովի ապաշրջափակման շուրջ․ Ուկրաինան համաձայն չէ պայմաններին․ Bloomberg
Քաղաքականություն
06.06.2022 | 19:11
Bloomberg գործակալությունը, հղում անելով իր աղբյուրներին, հայտնում է, որ Ռուսաստանն ու Թուրքիան նախնական համաձայնության են եկել Սև ծովով ուկրաինական գյուղատնտեսական ապրանքների մատակարարումն ապաշրջափակելու վերաբերյալ, գրում է BBC-ի ռուսական ծառայությունը։
Սակայն, ըստ աղբյուրների, Ուկրաինան գործարքի պայմաններին դեռ համաձայնություն չի տվել։
Շարունակվող ռազմական գործողությունների պատճառով ուկրաինական ապրանքները, հիմնականում՝ հացահատիկը, չեն հասնում համաշխարհային շուկաներ, ինչը սպառնում է սովի մատնել դրանից կախված մի քանի շրջանների։ Լրատվամիջոցը գրում է, որ Թուրքիայի նախագահ Ռեջեփ Թայիփ Էրդողանն առաջարկել է օգնել՝ ականազերծել Օդեսայի մերձակայքում գտնվող ծովի ափը և ուղեկցել ուկրաինական հացահատիկի նավերը։ Սակայն Ուկրաինան մտավախություն ունի, որ առանց պաշտպանության Օդեսան կարող է խոցելի լինել Ռուսաստանի կողմից հարձակման համար։
Սպասվում է, որ ՌԴ ԱԳ նախարար Սերգեյ Լավրովն ուկրաինական նավահանգիստների ապաշրջափակման հարցը քննարկելու է չորեքշաբթի Անկարայում բանակցությունների ժամանակ։
Ավելի վաղ ՌԴ նախագահ Վլադիմիր Պուտինն էր խոսել Սև ծովում ջրային ուղիները մաքրելու անհրաժեշտության մասին, որպեսզի ուկրաինական հացահատիկը հասնի իր նպատակակետին, և խոստացել, որ Մոսկվան չի օգտագործի այդ իրավիճակը ռազմական նպատակներով:
Bloomberg-ի տվյալներով՝ ՌԴ-ի և Թուրքիայի միջև համաձայնեցված պլանը ենթադրում է Օդեսայի մերձակայքում գտնվող ծովային տարածքի ականազերծում և ՄԱԿ-ի հովանու ներքո Սև ծովից նավերի անվտանգ անցման երաշխիքների ապահովում։ Ըստ գործակալության աղբյուրների՝ ուկրաինացիներն ուղղակիորեն ներգրավված են բանակցություններում։ Նշվում է նաև, որ Ռուսաստանը պահանջում է իրեն հնարավորություն տալ ստուգել առևտրային նավերը՝ պարզելու դրանցում զենքի առկայությունը, որի հետ համաձայն չէ Ուկրաինան։
Էմմա Չոբանյան
