09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
Լավրովը կմեկնի Անկարա․ բանակցությունների օրակարգում է նաև Լեռնային Ղարաբաղի հարցը
Քաղաքականություն
03.06.2022 | 14:50
ՌԴ ԱԳ նախարար Սերգեյ Լավրովը հունիսի 8-ին աշխատանքային այցով կմեկնի Անկարա, որտեղ նախատեսված են նրա բանակցությունները Թուրքիայի ԱԳ նախարար Մևլութ Չավուշօղլուի հետ։ Այս մասին այսօրվա ճեպազրույցում հայտնել է ՌԴ ԱԳՆ պաշտոնական ներկայացուցիչ Մարիա Զախարովան, գրում է ՏԱՍՍ-ը։
«Հունիսի 8-ին ԱԳ նախարար Սերգեյ Լավրովն աշխատանքային այցով կմեկնի Անկարա՝ Թուրքիայի արտգործնախարարի հետ բանակցությունների համար։ Նախատեսվում է քննարկել երկկողմ համագործակցության իրավիճակն ու խորացման հեռանկարները, հարցերի լայն շրջանում։ Իհարկե, խոսքն առևտրատնտեսական համագործակցության մասին է՝ Արևմուտքի կողմից Ռուսաստանի դեմ ոչ լեգիտիմ պատժամիջոցների կիրառման պայմաններում»,- ասել է Զախարովան։
Նա հավելել է, որ կողմերը քննարկելու են նաև Ուկրաինայում իրավիճակը, ինչպես նաև տարածաշրջանային հարցեր, այդ թվում՝ Լեռնային Ղարաբաղի հակամարտությունը։
«Տեղի կունենա մտքերի փոխանակում տարածաշրջանային և միջազգային օրակարգի ակտուալ հարցերի շուրջ, առաջին հերթին՝ Ուկրաինայի ներկայիս իրավիճակի, ինչպես նաև սիրիական, լիբիական, Լեռնային Ղարաբաղի կարգավորման, Բալկաններում, Աֆղանստանում, Կենտրոնական Ասիայում իրավիճակի շուրջ»,- նշել է Զախարովան։
Հիշեցնենք, որ հունիսի 10-ին էլ Լավրովը կժամանի Հայաստան՝ մասնակցելու ՀԱՊԿ ԱԳ նախարարների խորհրդի նիստին։
Էմմա Չոբանյան
