07.08.2026 | 23:37
Անձրև, ամպրոպ և ջերմաստիճանի նվազում. առաջիկա օրերի եղանակի կանխատեսումը
Դժբախտ դեպք՝ նկարահանման ժամանակ․ Արշակունյաց պողոտայից հիվանդանոց է տեղափոխվել 37-ամյա Արթուր Ղանդիլյանի անշնչացած մարմինը
Հասարակություն
03.06.2022 | 14:28
Երեկ դժբախտ դեպք է տեղի ունեցել Երևանում․ Արշակունյաց պողոտայի 56/11 հասցեում գտնվող պահեստային շինությունում ֆիլմ նկարահանելիս 37-ամյա Արթուր Ղանդիլյանը աստիճաններով բարձրացել է մետաղական կոնստրուկցիայի վրա ոտքը սայթաքել, ընկել է և մահացել։
«Երեկ ժամը 20․20-ին հիվանդանոցից ահազանգ է ստացվել, որ Արշակունյաց պողոտայից կենսաբանական մահ ախտորոշմամբ շտապօգնության խումբն իրենց մոտ տեղափոխել է մի տղամարդու։ Մեկնած օպերատիվ խումբը պարզել է, որ 19․25-ին Արշակունյաց պողոտայի 56/11 հասցեում գտնվող պահեստային շինության մեջ ֆիլմ նկարահանելու համար նախատեսված աշխատանքների ժամանակ Արթուր Ղանդիլյանը աստիճաններով բարձրացել է մետաղական կոնստրուկցիայի վրա, որտեղ էլ ոտքը սայթաքելու հետևանքով ընկել ու ստացել է կյանքի հետ անհամատեղելի վնասվածքներ»,- Factor.am-ին տեղեկացրեց ՀՀ ոստիկանության ԶԼՄ-ների հետ կապի բաժնի պետ Զարզանդ Գաբրիելյանը:
Նշենք, որ Արթուր Ղանդիլյանը օպերատորի օգնական էր։ Մամուլը գրում է, որ նա աշխատում էր «Kentron TV»-ում, սակայն hեռուստաընկերությունից Factor.am-ի հետ զրույցում ասացին, որ նա տարիներ առաջ է իրենց մոտ աշխատել։
Արթուր Ղանդիլյանի ֆեյսբուքյան էջում նշված է, որ աշխատում է «Love is Production»-ում։ Ընկերությունից մեզ վստահեցրին՝ Ղանդիլյանը վաղուց իրենց աշխատակիցը չէ։ Դեպքի առթիվ ոստիկանությունում նյութեր են նախապատրաստվում։
Արփի Հակոբյան
