Ռուսաստանը Չինաստանից տնտեսական օգնություն է խնդրել, սակայն Պեկինը վախենում է պատժամիջոցներից․Washington Post

Ամերիկյան Washington Post-ը, վկայակոչելով ամերիկացի և չինացի երկու անանուն պաշտոնյայի,  հայտնում է, որ պատերազմի սկզբից Ռուսաստանը բազմիցս Չինաստանից տնտեսական աջակցություն է խնդրել, սակայն Պեկինը վախենում է ամերիկյան պատժամիջոցներից, և այդ խնդրանքները զայրացնում են նրան, փոխանցում է BBC-ի ռուսական ծառայությունը։

Հռետորաբանության մակարդակում Պեկինն աջակցում է Մոսկվային, կատարվածի մեղքը բարդում ՆԱՏՕ-ի վրա,  ձեռնպահ է մնում ՄԱԿ-ի Անվտանգության խորհրդում այն ​​բանաձևերի օգտին քվեարկել, որոնց դեմ է Ռուսաստանը, պետական ​​լրատվամիջոցներով ռուսամետ դիրքերից խոսում է այսպես կոչված «հատուկ գործողության» մասին, սակայն, ինչպես նշում են փորձագետները, չինական աջակցությունը դրանից հեռուն չի գնում:

Նշվում է, որ առնվազն երկու անգամ ռուս դիվանագետները Չինաստանին խնդրել են տնտեսական աջակցության նոր ձևեր և մատնանշել Չինաստանի կողմից մինչև փետրվարի 24-ը ստանձնած «առևտրային պարտավորությունները»: Լրավամիջոցի չինացի աղբյուրը հայտնել է, որ այդ խոսակցությունները լարված են անցել։

«Չինաստանը հստակ հայտարարել է իր դիրքորոշումը Ուկրաինայի և Ռուսաստանի դեմ անօրինական պատժամիջոցների մասով ։ Մենք հասկանում ենք Մոսկվայի դժվար իրավիճակը։ Սակայն մենք չենք կարող արհամարհել և մեր սեփական դիրքը այդ երկխոսության մեջ։ Չինաստանը միշտ գործելու է  չինացի ժողովրդի լավագույն շահերից ելնելով»,-ասել է Պեկինի աղբյուրը։

ԵՎ՛ չինական, և՛ ամերիկյան աղբյուրները նշել են, որ Չինաստանի նախագահ Սի Ցզինպինը իր օգնականներին առաջադրանք է տվել գտնելու ուղիներ՝ օգնելու Ռուսաստանին առանց ԱՄՆ պատժամիջոցների տակ հայտնվելու:

«Երկար ժամանակ Չինաստանն ու Ռուսաստանը պահպանել են նորմալ համագործակցությունը տնտեսության, առևտրի և էներգետիկայի ոլորտներում։ Խնդիրը այնտեղ չէ, թե ով կօգնի Ռուսաստանին շրջանցել պատժամիջոցները, այլ այնտեղ, որ Ռուսաստանի և Չինաստանի միջև նորմալ առևտրատնտեսական  հարաբերություններն անհարկի տուժել են»,-լրատվամիջոցին ասել է Վաշինգտոնում Չինաստանի դեսպանատան մամուլի ներկայացուցիչ Լյու Պենյույը։

Էմմա Չոբանյան