Նիկոլ Փաշինյանը պետք է շատ արագ արմատական փոփոխություններ իրականացնի, ժամանակը հեղափոխության օգտին չի աշխատելու. Արմեն Մարտիրոսյան. ՏԵՍԱՆՅՈՒԹ

Դժվար է վստահաբար պնդել, որ մայիսի 8-ին Հայաստանը կունենա վարչապետ: Factor.am-ի հետ զրույցում հայտարարեց «Ժառանգություն» կուսակցության նախագահ Արմեն Մարտիրոսյանը:

«Մեծամասնությունը Հանրապետական կուսակցության ձեռքում է, նախորդ անգամ էլ խնդիր չպետք է լիներ, բայց եղավ: Այս դեպքում հնարավոր է նորից փորձեն սաբոտաժի ենթարկել: Ցանկացած դեպքում իշխանությունն  արդեն ժողովրդի ձեռքին է, ոչ թե Հանրապետականի: Անկախ նրանից, թե  իրադարձություններն ինչ ուղղությամբ կընթանան, ակնհայտ է, որ արտահերթ ընտրություններով իշխանությունը նաև դե յուրե կանցնի ժողովրդի ձեռքը»,- նշեց Արմեն Մարտիրոսյանը:

Ըստ պարոն Մարտիրոսյանի՝ եթե մինչ մայիսի 1-ը իշխանությունը հնարավորություն ուներ քաղաքական գործընթացներում, ապա մայիսի 1-ից հետո այդ հնարավորությունն էլ չի լինելու:

«Այդ օրն իրենք հակապետական քայլ կատարեցին, այն առումով, որ մեզ մոտ օր առաջ պետք է ֆիքսվեր ժողովրդի իշխանությունը, և Հայաստանը պետք է ունենար վարչապետ»,- ընդգծեց ընդդիմադիր գործիչը:

Անդրադառնալով մայիսի 1-ին խորհրդարանում Հանրապետական խմբակցության ներկայացուցիչների ելույթներին, որ Նիկոլ Փաշինյանին չեն տեսնում Հայաստանի գերագույն գլխավոր հրամանատարի դերում, «Ժառանգություն» կուսակցության նախագահը շեշտեց, ո Փաշինյանն ընդհանրապես կարող էր այդ հարցերին չպատասխանել, ապա հավելեց. «Ինքը ժողովրդի կողմից լիազորված է լուծելու սահուն իշխանափոխության խնդիրը, արտահերթ ընտրություններին գնալու խնդիրը»:

Հարցազրույցն ամբողջությամբ՝ տեսանյութում:

Շողիկ Գալստյան